Ribadeo, 20 de febreiro de 2026. A conselleira de Economía e Industria, María Jesús Lorenzana, subliñou hoxe que o cen por cento da enerxía que xestione Recursos de Galicia (RDG) vai repercutir no territorio galego, e animou o resto de promotores eólicos a sumarse a este programa e facelo extensivo a toda a comunidade.
“O cen por cento da enerxía que teña RDG vai repercutir na nosa comunidade autónoma. Esta é a esencia desa nova política eólica que estamos defendendo e á que eu espero sumar os distintos responsables políticos, con independencia do seu partido, para que en Galicia poidamos ter un diferencial grazas a que temos tamén un diferencial que é o recurso natural”, manifestou.
Nesta liña, fixo un chamamento ao resto de promotores eólicos a “copiar” este proxecto que “é o inicio”, dixo, da nova política eólica de Galicia. “RDG está á disposición para continuar participando en máis parques e que isto se poida facer extensivo a toda a comunidade galega”, remarcou.
Lorenzana mantivo hoxe un encontro cos alcaldes dos concellos de Ribadeo, Trabada e Barreiros, que se van beneficiar dunha bonificación no consumo eléctrico grazas á compra por parte de RDG do parque eólico Mondigo. Segundo avanzou, ademais do desconto no 80 por cento da factura para os veciños deses municipios que vivan nun radio de 1,8 quilómetros do parque, tamén se está a traballar nun plan industrial que permita reducir a factura ás empresas da contorna.
A conselleira explicou que se trazou ese radio para que o parque sexa economicamente viable e tratando de coller parroquias ou núcleos de poboación enteiros. Nese sentido, asegurou que se vai traballar da man dos concellos por ser “quen mellor coñecen o territorio” e á hora de aprender o manexo da páxina web. “Que ningún veciño pense que vai quedar fóra por esta razón”, asegurou.
Nas súas declaracións, manifestou estar percibindo “a mellor das vontades” por parte dos tres municipios a colaborar e seguir traballando nos vindeiros meses para implantar este proxecto.
Segundo explicou, a previsión de RDG é que nun prazo de seis meses o desconto poida estar absolutamente operativo. “Imos tentar que sexa en menos”, dixo, “poñémonos a traballar de xeito inmediato”.
Esta bonificación poderase solicitar a través da páxina web rdgmondigo.gal, que está “practicamente preparada para lanzarse”, adiantou. É importante destacar que o dereito a ese desconto xa se ten polo feito de ser residente nese radio próximo ao parque , pero hai que solicitalo nesa web. Aí, ademais dos datos para comprobar que se cumpren os requisitos para ser beneficiario, as persoas solicitantes terán que presentar as 12 últimas facturas.
Ao respecto, Lorenzana explicou que, desde o momento en que se recoñece o dereito, o desconto xa se devenga, con independencia de que logo se teña que negociar desde cada fogar coa comercializadora correspondente. Tamén apuntou que se está adherida ao programa, o desconto farase directamente e, se non, os usuarios poderán acudir á comercializadora de RDG como recurso alternativo para que ninguén quede fóra, concluíu.
Veciños e empresas verán unha rebaixa no consumo enerxético co modelo que a Xunta aplicará na área de influencia do parque eólico do Mondigo. Así o subliña o alcalde ribadense, Dani Vega.
O rexedor contou que “hoxe visitounos a conselleira de Industria, Mª Jesús Lorenzana, para concretar o anuncio que se fixo despois do Consello da Xunta. Foi un anuncio, unha inversión anunciada polo presidente da Xunta, que ten un impacto positivo en Ribadeo e tamén nos concellos limítrofes de Trabada e de Barreiros”.
Para Vega “esta inversión o que vén sendo é un reforzo á industria, á industria eólica, que evidentemente non debemos desaproveitar ningunha das oportunidades. E desde logo, aquí o que nos traslada a conselleira é que vai haber un impacto moi positivo nos beneficios económicos para Ribadeo, evidentemente é un reforzo da industria, é un reforzo para a creación de emprego e tamén vai ter grandes beneficios para os veciños e veciñas de Ribadeo e da contorna”.
O alcalde subliñou que “esa rebaixa do 80 % do prezo da luz, do prezo do recibo da luz, eu creo que é un beneficio evidentemente directo a cada veciño. Estamos a falar así, nun primeiro análise, de que pode ter un impacto para 540 persoas. E iso é, evidentemente, unha boa noticia. Vamos ter esta reunión para concretar qué influencia, qué área pode coller e se se pode incrementar, vamos valoralo. En definitiva, estamos falando de xestións feitas que estaban paralizadas, que algún estaba moi interesado en paralizar e evidentemente o que fixemos dende este goberno e dende a Xunta de Galicia foi traballar arreo para que Recursos de Galicia, que é este resorte importante para Galicia, porque estamos a falar dunha inversión público-privada con beneficios directos para Galicia e concretamente para o territorio do que estamos a falar, tanto de Ribadeo como dos concellos limítrofes”.
Dani Vega engadiu: “seguimos xestionando inversión para a zona, concretamente hoxe estamos falando dunha xestión que, evidentemente, Ribadeo liderou e que vamos seguir traballando para que tanto empresas como industrias veñan, observen un territorio que ten moitas posibilidades e vamos a seguir traballando para xestionar o máximo para Ribadeo. Moitas grazas á conselleira, grazas á Xunta e seguimos traballando para que avancen proxectos importantes para Ribadeo”.
O alcalde de Trabada, Rubén García Freije, participou no encontro celebrado en Ribadeo.
Así mesmo, o Concello de Trabada pon a disposición da veciñanza as súas instalacións e os seus técnicos para prestar apoio no proceso de solicitude destas bonificacións, xa que as persoas que resulten incluídas no mapa recibirán unha comunicación nas súas vivendas e deberán iniciar posteriormente o trámite correspondente a través dunha plataforma web.
O alcalde de Trabada destacou o bo entendemento entre todas as partes presentes na reunión e subliñou que “dende o Concello seguimos traballando para que un proxecto desta importancia teña tamén un retorno directo para os veciños e veciñas de Trabada”.
Estará dedicada á figura de Leopoldo Calvo-Sotelo, xa que neste 2026 cúmprese o centenario do nacemento de quen fora presidente do Goberno. No acto interviñeron o presidente do RCNR, Pablo Fernández, o director territorial de Deportes da Xunta, Manuel Otero, un dos fillos do tamén alcalde honorario de Ribadeo Víctor Calvo-Sotelo, e o rexedor ribadense, Dani Vega. Todos exaltaron a práctica deportiva na ría, a labor desenvolvida polo Real Club Náutico e a vinculación de Leopoldo Calvo-Sotelo co estuario. Entre o público asistente estaban máis membros da familia Calvo-Sotelo, directivos e ex directivos do RCNR, edís de Ribadeo e representantes de Acisa.
O grupo, composto por cinco mulleres e sete homes cunha media de 26 anos, foi recibido pola subdelegada do Goberno, Olimpia López, que lles agradeceu o compromiso co servizo público e destacou o papel esencial da Policía Nacional na seguridade cidadá. Oito axentes estarán na Comisaría de Lugo, dous en Monforte e dous en Viveiro. Ao finalizar as prácticas, escollerán destino definitivo segundo a puntuación obtida no proceso selectivo.
A iniciativa busca poñer en valor a diversidade cultural do municipio a través da gastronomía, convidando ás persoas de diferentes países a elaborar pratos típicos que se ofrecerán de forma gratuíta ao público. O Concello asumirá o custo dos ingredientes e asignará a cada participante un posto identificado co seu país de orixe. As inscricións poden realizarse ata o 29 de xullo enviando un correo a feiras@vilalba.es. Rouco chamou á participación para seguir construíndo unha Vilalba aberta e integradora, nunha feira que quere consolidarse como espazo de convivencia e dinamización da feira tradicional.
Ata o 4 de agosto poderán realizarse as renovacións, mantendo as tarifas aprobadas en asemblea: 200 € e 250 € para adultos, e acceso gratuíto para menores grazas ao convenio coa Fundación Imdecum, con opción voluntaria de abono infantil por 40 € con reserva de asento. A partir do 5 de agosto activaranse as novas altas. Os abonos poderán tramitarse a través de CLUBER ou presencialmente na oficina do club, con horario de mañá e tarde en xullo e só de mañá en agosto.
A Presidenta Carmela López destacou o valor deste produto emblemático da Mariña e o traballo do sector pesqueiro. Rocío Rivera e Herminia Pernas puxeron en valor a tradición mariñeira de Burela e o papel dos mariñeiros da Moncloa. O público degustou 450 tapas elaboradas con bonito nunha xornada que serviu de escaparate desta cita gastronómica e de convite a visitar Burela a próxima fin de semana.
As crianzas desfrutaron dunha refrescante xornada con inchables e xogos acuáticos na contorna do complexo deportivo da Veiga.
Trátase dunha mostra de 28 fotografías de gran formato do naturalista Ezequiel Martínez que reivindica a diversidade e a conservación da fauna salvaxe. A iniciativa, organizada polo Concello da Pastoriza en colaboración con ABANCA e Afundación dentro do proxecto Corrente cultural, poderá visitarse de balde ata o 26 de agosto. As imaxes, acompañadas de textos divulgativos elaborados por especialistas de Naturnova, amosan especies emblemáticas como o oso pardo, a cegoña, o cervo ou a aguia imperial, convidando a reflexionar sobre a importancia de protexer o patrimonio natural.
