O Goberno reafirma en Trabada o seu compromiso co acceso á vivenda no rural

O delegado analizou co alcalde, Rubén García, as oportunidades do novo Plan Estatal, con 399 millóns para Galicia e medidas específicas para a mocidade do rural

Trabada, 24 de abril de 2026. O delegado do Goberno en Galicia, Pedro Blanco, reafirmou hoxe no Concello de Trabada o compromiso do Goberno co acceso á vivenda en núcleos rurais como medida clave para fixar poboación e crear oportunidades para a mocidade.

O delegado, acompañado pola subdelegada do Goberno en Lugo, Olimpia López, mantivo unha reunión co alcalde, Rubén García, e o seu equipo de goberno, comprobando “a aposta que este concello leva tempo facendo para facilitar o acceso dos seus veciños e veciñas a un fogar”.

Posteriormente, visitaron un dos edificios que o Concello prevé destinar a uso social, unha iniciativa para a que o alcalde ten previsto solicitar financiamento ao abeiro das liñas de Reto Demográfico ao longo deste ano. O delegado valorou positivamente esta iniciativa da que dará traslado, xa que contribuirá á dinamización demográfica e social do municipio.

Durante o encontro, Pedro Blanco trasladoulle ao rexedor algunhas das medidas máis relevantes do recentemente aprobado Plan Estatal de Vivenda 2026-2030, que mobilizará 400 millóns de euros en Galicia nos vindeiros cinco anos. O delegado subliñou que este novo plan “blinda a protección pública da vivenda e reforza a aposta por un modelo no que a vivenda é un dereito e non un ben de mercado”.

Entre as medidas, destacou as axudas dirixidas á mocidade, que poderán acadar ata 300 euros para o alugueiro e ata 15.000 euros para a adquisición ou construción da primeira vivenda en concellos de menos de 20.000 habitantes, como é o caso de Trabada, favorecendo así o asentamento de poboación no rural.

Pedro Blanco puxo ao Concello de Trabada como exemplo de boas prácticas no impulso de políticas públicas de vivenda desde o ámbito local, subliñando o seu papel activo na procura de solucións adaptadas ás necesidades da veciñanza. Neste senso, citou algunhas das iniciativas expostas polo alcalde como o futuro Plan de Vivenda municipal, que permitirá mobilizar vivenda baleira, así como as actuacións xa desenvolvidas para rehabilitar antigas escolas e destinalas a vivenda social.

O delegado incidiu en que “os concellos son actores fundamentais para dar resposta ao reto da vivenda, porque coñecen de primeira man a realidade dos seus territorios”, e reafirmou que o Goberno “seguirá sendo o seu mellor aliado, ofrecendo recursos e ferramentas para avanzar cara a un modelo de vivenda accesible, sostible e social”.

Na reunión, o alcalde tamén trasladou ao delegado distintas cuestións de interese para o municipio, entre elas asuntos relacionados co despregamento da fibra óptica e o funcionamento do servizo de Correos, fundamentais para garantir a igualdade de oportunidades e a calidade de vida da veciñanza no rural.