Detido un veciño de Cervo por un roubo con violencia nun establecemento de San Cibrao

Cervo, 27 de abril, 2026. A Garda Civil detivo un veciño de Cervo, de 20 anos, como presunto autor dun delito de roubo con violencia cometido no interior dun establecemento comercial situado na localidade de San Cibrao.

Os feitos tiveron lugar na madrugada do pasado domingo, cando os axentes recibiron un aviso que alertaba de que un mozo se introducira nun local e estaba a forcexar coas persoas que o sorprenderan in fraganti.

Ao chegar ao punto, unha familiar do propietario explicou que, tras recibir o aviso, acudiran ao establecemento —actualmente utilizado como almacén— onde localizaron no interior un mozo que portaba varias botellas de bebidas alcohólicas. Cando intentou abandonar o lugar cos obxectos subtraídos, foi interceptado polo propietario, iniciándose un forcexo no que o presunto autor reaccionou con violencia, propinando golpes que causaron lesións de consideración no pescozo e no peito, ademais de romper parte da roupa da vítima.

Durante o forcexo romperon varias das botellas que pretendía levar, polo que o mozo fuxiu precipitadamente, deixando atrás varios efectos persoais: unhas chanclas, un gorro e unha chaqueta.

Varios testemuños presenciais confirmaron o sucedido e indicaron que o autor abandonara o lugar descalzo. Tamén sinalaron que momentos antes fora visto na vía pública moi alterado, cun comportamento violento e golpeando mobiliario da terraza do establecemento, o que obrigou clientes e traballadores a refuxiarse no interior.

Coa recollida dos efectos persoais, os axentes lograron localizar o mozo nas inmediacións, acompañado do seu pai. Nun primeiro momento negou a súa implicación e a propiedade das prendas intervidas, aínda que os axentes comprobaron que coincidían plenamente coa súa complexión e vestimenta. Xa en dependencias oficiais, durante o cacheo previo ao ingreso en calabozos, observouse que portaba baixo o pantalón unhas bermudas da mesma marca que as chanclas, momento no que recoñeceu a propiedade dos efectos.

Por todo isto, procedeuse á súa detención como presunto autor dun delito de roubo con violencia. Foi informado dos seus dereitos e posto a disposición da autoridade xudicial, que decretou o seu ingreso en centro penitenciario.