ADEGA acusa a Xunta de distorsionar os datos sobre o lobo e de obstruír a súa protección

Compostela, 28 de maio, 2026. No marco do proceso de información pública do informe sexenal sobre o Canis lupus, promovido polo MITERD, ADEGA vén de presentar alegacións, centradas especialmente no documento remitido pola Xunta de Galicia, que sostén que a especie se atopa nun estado de conservación favorábel. A organización ecoloxista considera que esta afirmación non se axusta ás evidencias científicas recollidas polo propio MITERD, que apuntan a un estado de conservación desfavorábel tanto a nivel estatal como en Galicia.

Segundo ADEGA, o documento alternativo da Xunta emprega argumentos e datos cunha solidez metodolóxica moi cuestionábel. Un dos puntos máis críticos é o uso de metodoloxías dispares nos censos realizados entre 2021 e 2022. A entidade lembra que, tras o censo oficial de 2021 —no que se detectaron arredor de 76 mandas—, a Xunta realizou en 2022 mostraxes parciais con cambios metodolóxicos e sen participación dos axentes ambientais, centradas só en áreas con resultados negativos. A suma destes datos posteriores, segundo ADEGA, distorsiona o resultado final e podería inflar artificialmente a estimación de mandas reprodutoras.

Mesmo aceptando as cifras oficiais da Xunta (93 grupos en 2021-2022 fronte a 90 en 2012-2015), ADEGA subliña que a taxa de crecemento anual sería dun 0,47%, un indicador de estancamento poboacional. Se se tomasen só os datos de 2021, a taxa sería negativa (-2,44%), o que apuntaría a unha tendencia regresiva. A entidade atribúe este estancamento ao furtivismo e ás mortes non naturais, que poderían situarse entre 200 e 300 lobos ao ano.

ADEGA tamén lembra que a xestión da especie por parte da Xunta foi sinalada polo TSXG, que advertiu da falta de análises técnicas propias e da utilización de información procedente de denuncias e artigos de prensa sen verificación de campo. Para a organización ecoloxista, esta situación evidencia un uso político e demagóxico da especie, que dificulta tanto a súa protección efectiva como a convivencia coa gandería.

Finalmente, ADEGA considera que o informe presentado pola Xunta busca obstruír o proceso de protección real do lobo e non responde ás necesidades nin da conservación da especie nin das explotacións gandeiras afectadas.