Muras recibe a Maleta Viaxeira contra a Violencia de Xénero da Subdelegación do Goberno

O Concello de Muras súmase aos de Taboada, Sarria, Lugo, Ribeira de Piquín e outros, que analizaron durante os últimos meses estes textos, que promoven a reflexión, a sensibilización e concienciación

Muras, 13 de agosto de 2026. A subdelegada do Goberno en Lugo, Olimpia López, destacou hoxe no Concello de Muras “a necesidade de formar á sociedade en igualdade a través da lectura de textos feministas que contribúan a rematar con comportamentos sexistas e pouco igualitarios”. Así o afirmou nunha nova entrega da Maleta Viaxeira contra a Violencia de Xénero, acompañada polo alcalde, Manuel Requeijo.

O proxecto MAVI: a Maleta Viaxeira contra a Violencia de Xénero é unha iniciativa promovida pola Subdelegación do Goberno, que achega libros de diferentes temáticas relacionadas co feminismo, a igualdade, o empoderamento, a autoestima ou a violencia machista ás veciñas e veciños de todas as idades.

Olimpia López fixo entrega da maleta con 12 libros para o concello, salientando a boa acollida que ten este programa na provincia. Destacou, neste senso, a importancia deste recurso como ferramenta “para remover conciencias e cambiar hábitos machistas que aínda están presentes nunha sociedade que, a día de hoxe, continúa marcada por condutas sexistas e patriarcais”.

“MAVI é un proxecto máis necesario que nunca, pois, por desgraza, vemos a diario como o número de asasinatos machistas non deixa de crecer”, advertiu López, quen pediu apoio e unanimidade de todas as institucións “para seguir desenvolvendo políticas públicas destinadas a transformar a nosa sociedade nunha más igualitaria, xusta e segura para as mulleres”.

Para finalizar, a subdelegada agradeceu ao Concello de Muras a súa colaboración con esta iniciativa, “xa que, desde o Goberno, traballamos man a man cos concellos para abordar esta cuestión de Estado, creando conciencia sobre un problema que nos afecta a todas e todos”.

Con esta entrega, o Concello de Muras, súmase aos de Viveiro, Sarria, Vilalba, Meira, Trabada, Quiroga, Cervantes, Barreiros, Chantada, Monforte, Burela, Taboada, Sarria, Lugo e Ribeira de Piquín, así como aos centros penitenciarios de Bonxe e Monterroso, que analizaron estes textos que promoven a reflexión, a sensibilización e concienciación sobre temas determinantes para construír unha sociedade libre de violencias, favorecendo un pensamento crítico ante os estereotipos e roles de xénero que perpetúan estas violencias e desigualdades.

En total, son tres maletas as que están a percorrer a provincia con este material que seguirá a súa viaxe en centros de información á muller, asociacións de mulleres vítimas de violencia de xénero e servizos sociais dos municipios que soliciten a maleta.

Catálogo de libros

Entre os títulos que garda a maleta entregada en Muras están: “Insolación”, de Emilia Pardo Bazán; “Soy una niña rebelde”, de Francesca Cavallo e Elena Favili; “Desearmar la masculinidad”, de Beatriz Ranea Triviño; “La mujer del porvenir”, de Concepción Arenal; “Maternidades S.A.”, de Laura Nuño; “El bosque de los cuatro vientos”, de María Oruña; “Muejres invisibles para la medicina”, de Carme Valls Llobet; “El lunes nos querrán”, de Najat El Hachmi; “Tierra de mujeres”, de María Sánchez; “La revuelta de las putas”, de Amelia Tiganus, “La tierra de las mujeres”, de Sandra Barneda; e “El color púrpura”, de Alice Walker.