Olimpia López destaca en Trabada o apoio do Goberno aos novos agricultores co Programa Cultiva

O programa conta cunha dotación de 1,2 millóns de euros ampliables, por parte do Ministerio de Agricultura, Pesca e Alimentación

Trabada, 9 de setembro de 2026. A subdelegada do Goberno en Lugo, Olimpia López, destacou hoxe en Trabada o compromiso do Goberno cos novos agricultores e gandeiros ofrecendo estancias formativas en explotacións modelo de toda España co Programa Cultiva, que conta cun orzamento de 1,2 millóns de euros do Ministerio de Agricultura, Pesca y Alimentación.

“Dende o Goberno mantemos unha clara aposta polo sector primario, fundamental para a nosa provincia, capaz de xerar emprego e impulsar a economía, ao tempo que axuda a fixar poboación nos nosos municipios”, subliñou López durante unha visita a unha explotación agrícola en Trabada que participa neste plan estatal.

A subdelegada, acompañada do alcalde de Trabada, Rubén García, explicou que este programa do Ministerio de Agricultura ten como obxectivo ofrecer, a profesionais agrarios titulares de explotación de ata 40 anos e para aqueles de máis de 41 que se instalasen nos últimos cinco anos, formación práctica de 5 a 14 días en explotacións modelo, “onde teñan a oportunidade de adquirir e consolidar coñecementos sobre aspectos técnicos e de xestión que logo aplicarán no desenvolvemento da súa propia actividade agraria”.

Así, Breogán e Sergio son os donos dunha horta dedicada á produción hortícola baixo os parámetros de agricultura ecolóxica. A maioría da súa produción comercialízase en comercios moi próximos a Fórnea, a aldea na que crearon a súa cooperativa. O próximo mes de maio esperan recibir a un solicitante que desexe realizar a súa estancia dentro do plan con eles.

Durante o encontro, Olimpia López animou a todos os interesados a realizar a súa solicitude antes do 15 de setembro, que termina o prazo, e puxo en valor este tipo de iniciativas que “amosan o compromiso do Goberno de Pedro Sánchez co sector agrario, favorecendo a incorporación da mocidade e potenciando a súa profesionalización, co principal obxectivo de responder a un dos retos máis relevantes aos que nos enfrontamos actualmente, o relevo xeracional”.

En relación ao Programa Cultiva, a subdelegada engadiu que o Goberno faise cargo dos gastos de aloxamento, manutención e transportes dos participantes nas estancias formativas. Coa de Trabada, na provincia participan 22 explotacións modelo de acollida situadas en A Pontenova, Chantada, Friol, Carballedo, Ribeira de Piquín, O Incio, Ribadeo, Becerreá, Vilalba, Outeiro de Rei, Triacastela, O Corgo, Pantón, Mondoñedo, Begonte e Negueira de Muñiz. En cada unha hai un responsable de formación encargado de transmitir, desde a súa experiencia e tipos de produción, coñecementos prácticos e técnicos que os mozos poidan despois aplicar nas súas explotacións.