O BNG denuncia na Comisión de Educación o grave deterioro do CEIP Vista Alegre de Burela

Daniel Castro denuncia o mal estado do centro: humidades e filtracións, aseos en estado insalubre, desprendementos ou barreiras de accesibilidade

Santiago de Compostela, 8 de outubro, 2026. A través dunha pregunta parlamentaria, o deputado pola comarca do BNG, Daniel Castro, fíxose eco na Comisión de Educación das reivindicacións da comunidade educativa do Centro de Educación Infantil e Primaria (CEIP) Vista Alegre de Burela, que leva anos agardando por unha reforma integral dunhas infraestruturas que teñen xa máis de corenta anos.

Tal e como denunciou Castro, o centro ten humidades e filtracións recorrentes, aseos en estado insalubre, fugas de auga, deterioro estrutural de pavimentos e columnas, unha instalación eléctrica obsoleta, a carpintería deteriorada, o peche perimetral inacabado, ventás e persianas en mal estado e importantes barreiras de accesibilidade.

Problemas todos estes que están “moi ben recollidiños” nunha memoria de corenta páxinas elaborada por ANPA, dirección e Consello Escolar e que hai tempo que lle foi entregada á Xunta. “Supoño que foi directamente ao lixo”, lamentou o deputado nacionalista, para denunciar que até o momento o único que fixo o Goberno do PP foi “botar balóns fóra” e intentar culpar ao Concello, que “xa fixo o que lle correspondía”.

“Levo xa varias visitas ao centro e cada vez está peor”, subliñou Castro, advertindo de situacións que afectan directamente á saúde e ao benestar do alumnado e do profesorado, como son a existencia de mofo, pequenos desprendementos ou luminarias incompatibles coa normativa de seguridade, tamén recollidas na memoria.

É por iso que o deputado do BNG reclamou á Consellería que dunha vez por todas atenda a demanda da comunidade docente e acometa a reforma integral que exixen desde hai “anos e anos”. “E non vale que nos queiran presentar como obra faraónica das catro míseras ventás e as dúas portas que puxeron”, salientou.

Xunto ás deficiencias do CEIP Vista Alegre, Castro denunciou tamén as carencias que sofren o Instituto de Educación Secundaria (IES) O Perdouro e o CEIP Os Castros, tamén en Burela.

Sobre o primeiro, instou ao secretario xeral de Educación a construír, cando menos, a cuberta da pista exterior do instituto, para o que a comunidade escolar reclama tamén baños e un pequeno almacén. Como no IES Vista Alegre, este centro, que atende a máis de 500 alumnos, ten tamén problemas de accesibilidade para persoas con mobilidade reducida o sofre de goteiras no ximnasio. A todo isto súmase, engadiu, a demanda de máis persoal.
Falta así mesmo persoal, denunciou o deputado nacionalista, no CEIP Os Castros, onde precisan persoal coidador e especialistas en Pedagoxía Terapéutica (PT) e Audición e Linguaxe. “A maiores, reportan problemas de humidades e goteiras nos edificios, concretamente no ximnasio”, precisou.

Castro lamentou a falta de concreción na resposta do secretario xeral de Educación, a quen reprobou pola negativa da Consellería a recibir aos representantes das anpa de Burela que llo teñen solicitado.