Deportes da Deputación e a Fundación Azkar promoven en Mondoñedo a formación en valores

Nota de prensa:
O DVD CO QUE O AZKAR LUGO FS PROMOVE A FORMACIÓN EN VALORES A TRAVÉS DO DEPORTE PRESENTOUSE EN MONDOÑEDO

A Área de Deportes colaborou coa Fundación Azkar neste proxecto que, baixo a dirección da Fundación deste club, gravou e realizou Telelugo

Mondoñedo, 16 de marzo de 2011. O delegado de Cultura e Deportes da Deputación de Lugo, Antonio Veiga, presentou esta tarde na casa da xuventude de Mondoñedo, acompañado por Xusto Fernández, o DVD que promoveu o club lucense Azkar para tratar de xerar un debate crítico sobre os comportamentos, valores e actitudes axeitados que se deben introducir a través do deporte. No DVD están presentes os responsábeis das institucións que o promoven, como Antón Bao, Antonio Veiga ou Manuel Vázquez, ademais de deportistas de clubs lucenses como Hugo Sánchez, do Azkar, Regina, do Durán Maquinaria Ensino, Mauro, nadador, Sergio Arias, ex xogador do Lugo natural de Portomarín, Bruno García, adestrador do Azkar, ou Tito Margaride, atleta.

Desde un primeiro momento, a Área de Deporte apoiou esta iniciativa da Fundación Azkar Lugo porque fai chegar aos rapaces e rapazas, a través do DVD, exemplos e testemuñas de deportistas que coñecen, poñendo de manifesto a importancia de fomentar o deporte como un aspecto fundamental do desenvolvemento integral da personalidade. Antonio Veiga afirmou que “esta iniciativa parte tamén coa idea de subliñar a idea de que o deporte debe estar ao servizo do desenvolvemento da persoa, xa que moitas veces semella, sobre todo nos ámbitos profesionais, que a persoa é a que está ao servizo do deporte, e non debe ser así”.

A Área de Deportes da Deputación apoiou á Fundación Azkar para levar a cabo este proxecto, ao igual que Telelugo, quen se encargou totalmente da realización do DVD que dura uns 11 minutos. O DVD pretende forzar un debate crítico e construtivo nos clubs, nos deportistas e nos rapaces e rapazas lucenses sobre o conxunto de comportamentos, valores e actitudes axeitados que se deben aplicar no mundo do deporte, e se hoxe en día se están a aplicar no deporte lucense. As copias do DVS foron distribuídas por todos os centros de ensino, clubs e concellos lucense coa idea de chegar, sobre todo, a un grupo de idade entre os 9 e 14 anos, para espallar esta idea da formación en valores a través do deporte que se defendeu sempre desde a Fundación Azkar Lugo e a escola Terra.