Sanidade anuncia que o Hospital da Costa disporá de unidade fixa de prevención de cancro de mama

Nota de prensa

Pilar Farjas Abadía participou en Burela nos actos conmemorativos do 25 aniversario do Hospital da Costa
A conselleira de Sanidade anunciou que Burela contará en xuño coa súa unidade fixa de prevención de cancro de mama

Este novo servizo permitirá que 9.000 mulleres de toda a comarca da Mariña se beneficien da mellora da calidade asistencial deste moderno equipamento
Anunciou a posta en marcha este ano das vías rápidas de cancro de mama e de próstata, que se suman ás vías rápidas xa implantadas de cancro otorrinolaringolóxico e colo-rectal
No tocante ás infraestruturas destacou que a área de xinecoloxía e obstetricia estará en funcionamento e plenamente operativa nas próximas semanas, tras o remate das obras
A conselleira de Sanidade fixo un recoñecemento público ao labor dos profesionais do hospital nestes 25 anos, onde se realizaron máis de 3 millóns de actos clínicos

Burela (Lugo), 6 de maio de 2011.- A conselleira de Sanidade, Pilar Farjas Abadía, anunciou que, no próximo mes de xuño, “poremos en funcionamento a nova unidade fixa para o programa de cribado de cancro de mama no hospital da Costa, na que atenderemos a máis de 9.000 mulleres da Mariña”. Estas máis de 9.000 usuarias do programa que se beneficiarán desta mellora, desglósanse, por concellos, do seguinte xeito: 450 de Barreiros, 1.313 de Foz, 377 de Xove, 728 de Cervo, 1.098 de Burela, 1.936 de Viveiro, 317 do Valadouro, 269 de Alfoz, 185 de Trabada, 575 de Mondoñedo, 358 de Lourenzá, 1.123 de Ribadeo, 164 de Ourol e 275 do Vicedo.

Esta nova unidade permitirá ofrecer un servizo de maior calidade, e con maior confort e intimidade para as pacientes, fronte a atención que recibían nas unidades móbiles, e súmase ás unidades doutros hospitais comarcais como Cee, Salnés, Verín ou o Barco. Así o destacou Pilar Farjas, quen presidiu o acto de conmemoración do 25 aniversario do Hospital da Costa, no que estivo acompañada pola delegada territorial da Xunta de Galicia, Raquel Arias Rodríguez, e pola directora de Recursos Humanos do Servizo Galego de Saúde, Esperanza Fernández Lago, entre outras autoridades.

A conselleira de Sanidade ratificou a aposta do seu departamento “para facer posible a ampliación da carteira de servizos e a potenciación do Hospital da Costa”, e engadiu que todas as actuacións que se están a levar a cabo “constitúen un esforzo que se manterá de cara ao futuro, para facer posible a ampliación da carteira de servizos e a potenciación do hospital. “Sei que temos que mellorar, e que entre todos conseguiremos facelo”.

A conselleira de Sanidade afirmou a importancia do traballo conxunto para atender aos mariñáns nos seus centros de saúde e no hospital da Costa, “por iso potenciamos a capacidade de resolución dos profesionais de atención primaria, e o traballo conxunto cos do hospital”.

Ampliación da carteira de servizos e mellora de infraestruturas
No ámbito da mellora asistencial, Pilar Farjas anunciou que este ano serán implantadas as vías rápidas de cancro de mama e de próstata, que se sumarán ás vías rápidas xa implantadas de cancro otorrinolaringolóxico e colo-rectal, e o proceso de insuficiencia cardíaca.

No tocante ás infraestruturas, a conselleira destacou que a obra da área de Xinecoloxía e Obstetricia estará en funcionamento e plenamente operativa moi pronto. Ademáis, lembrou outras melloras desenvolvidas como a das cubertas e a ampliación dos arquivos; así como as das áreas de pediatría, consultas, e farmacia; e outras actuacións xerais como a remodelación da rampla de acceso.

Para a titular de Sanidade, é fundamental destacar a importancia para o Hospital da Costa da implantación e desenvolvemento das novas tecnoloxías, como a historia clínica e a receita electrónica. Supoñen, -dixo a conselleira-, un avance sen precedentes e agora que xa están dispoñibles para a práctica totalidade da poboación fan posible a implantación de melloras na imaxe médica, a telemedicina, ou o acceso a probas diagnósticas.

Máis actividade no Hospital
Pilar Farjas agradeceu a todos os profesionais que nestes 25 anos de existencia de Hospital da Costa fixeron posible acadar “a complicidade e compromiso dos pacientes e cidadáns da Mariña”.

Ao longo deste cuarto de século, neste hospital naceron máis de 11.000 persoas; creáronse e custodiáronse máis de 190.000 historias clínicas, resultado de máis de 117.000 ingresos, máis de 95.000 intervencións, case dous millóns de consultas, máis de medio millón de urxencias, e 12.000 ingresos na unidade de coidados intensivos. Diariamente móvense por este hospital máis de 700 pacientes, que sumados aos profesionais e visitantes, completan unhas 2.000 persoas ao día neste centro.

A titular da carteira sanitaria do executivo galego destacou que a Consellería de Sanidade ten o firme compromiso de “atender aos pacientes no lugar máis próximo, e no menor tempo posible”. Froito deste compromiso é que o sistema sanitario público é o servizo máis e mellor valorado polos cidadáns, segundo datos do barómetro sanitario, no que se incrementa en case 6 puntos a valoración positiva da sanidade en Galicia, pasando do 71.6% en 2008 ao 77.5% no 2010; e no que aumentou, nun 5,6%, a porcentaxe de galegos que consideran a atención hospitalaria recibida como “boa ou moi boa” no ano 2010 respecto ao 2008.