O BNG propuxo a creación dunha comisión permanente de urbanismo en Barreiros

28 Xuño, 2011

Nota de prensa:
O BNG PROPUXO A CREACIÓN DUNHA COMISIÓN PERMANENTE DE URBANISMO NO CONCELLO DE BARREIROS. OS NACIONALISTAS CONSIDERAN QUE A NEGACIÓN DO GRUPO DE GOBERNO A CONSTITUILA É UNHA SINAL CLARA DE QUE TODO CONTINUARÁ COMO ATA O DE AGORA.

Barreiros, 28 de xuño de 2011. No pleno de organización celebrado onte á tarde no Concello de Barreiros o BNG propuxo a creación dunha comisión permanente de urbanismo. Os nacionalistas consideran que “a negación do grupo de goberno a constituila é unha sinal clara de que pretenden que todo continúe como ata o de agora no Concello barreirense”.

Na sesión plenaria o alcalde deu conta, entre outras cuestións, da composición das comisións e das delegacións do goberno municipal que ostentarán as concelleiras e concelleiros do grupo municipal de goberno. Desde o BNG din que “a proposta presentada é continuista porque mantén a mesma composición e as mesmas delegacións que nestes catro anos”.

A portavoz do BNG no Concello de Barreiros, Ana Ermida, sinalou que “o Partido Popular segue mantendo a mesma composición tanto na comisión de goberno como na comisión especial de contas, polo que todo parece indicar que están satisfeitos co traballo realizado e que apostan por seguir nunha liña continuista da xestión realizada ata o de agora”. Neste sentido, desde o BNG agardan “que a xestión destes próximos catro anos sexa máis eficaz que a anterior e que as concelleiras e os concelleiros do grupo de goberno se adiquen, precisamente a iso, a gobernar. E, desde logo, a defender os intereses xerais das veciñas e dos veciños. Polo tanto, agardamos que esta continuidade amosada polo grupo de goberno non se reflicta no xeito de gobernar e que se mellore a eficacia do goberno barreirense”.

Ermida explicou que “o BNG propuxo que, ademais da obrigatoria comisión especial de contas, se creara unha comisión permanente de urbanismo. Sen embargo, na proposta da Alcaldía nin sequera se crea unha delegación de urbanismo, asumindo directamente na súa persoa esta área. Consideramos que o alcalde négase a dar participación a toda a Corporación en temas urbanísticos, non participando da xestión desta área nen sequera os seus propios compañeiros”.

O BNG de Barreiros cre que “unha situación urbanística como a deste concello require dunha comisión permanente na que se dea cumprida información das cuestións relacionadas co urbanismo en Barreiros a todos os grupos da oposición”. Ana Ermida, a portavoz nacionalista, subliña que “a situación urbanística de Barreiros require dun coñecemento real da situación por parte da Corporación: cun plan sectorial aprobado e pendente de aplicación, cun PXOM sen redactar e cun importante volume de contenciosos abertos no xulgado relacionados co urbanismo, é fundamental a creación dunha comisión plural para tratar todos estes temas”.

Dende o Bloque Nacionalista Galego insisten en que “esta actitude demostra que ao Partido Popular e a Alfonso Fuente non lles interesa que exista transparencia nos temas urbanísticos do Concello de Barreiros”.