O alcalde de Ribadeo reitera que a delegada da Xunta comprometeuse a que a conselleira recibiría á comisión pro residencia

FERNANDO SUÁREZ NON QUERE POLEMIZAR COA XUNTA, PERO REITERA QUE DE RAQUEL ARIAS SAIU O COMPROMISO DE REUNIÓN ENTRE A CONSELLEIRA BEATRIZ MATO E A COMISIÓN INSTITUCIONAL PRO RESIDENCIA EN RIBADEO. O ALCALDE CONSIDERA QUE TOCA SEGUIR TRABALLANDO EN UNIDADE DE ACCIÓN.

Ribadeo, 24 de abril de 2012. O alcalde, Fernando Suárez, non quere entrar en polémicas coa Xunta, pero reitera que da delegada territorial da Xunta, Raquel Arias, saiu o compromiso de reunión entre a conselleira de Traballo e Benestar e a comisión institucional que reclama a construcción dunha residencia da terceira idade en Ribadeo. Suárez Barcia considera que a partires de agora toca seguir traballando en unidade de acción.

O rexedor sinalou esta mañá que “como alcalde de Ribadeo e como portavoz desta comisión na que traballamos por unha residencia na nosa vila non quero entrar en polémicas coa delegada da Xunta en Lugo, Raquel Arias, pero quero reiterar que o compromiso de reunión coa conselleira de Traballo e Benestar saiu da súa propia boca nunha xuntanza que mantivemos hai tres meses. Alí tamén estaban, ademáis do alcalde, os portavoces do PP e de UPRI, e o portavoz da plataforma de asociacións veciñais, polo tanto non é a palabra dunha persoa contra outra, senón que foi o compromiso da delegada territorial a toda unha comisión institucional que estaba alí”.

Fernando Suárez considera que “máis aló de todo iso o exemplo déuno a xente de Ribadeo, máis de mil persoas acudiron á manifestación reivindicando e reclamando algo que en xustiza Ribadeo debe ter. Non quero polemizar coa delegada da Xunta en Lugo nin quero sacar as contradiccións que pode haber no seu partido, porque si un tivese mala uva podía dicir a división interna que ten o PP de Ribadeo, porque hai concelleiros coma o portavoz, que acude ao pleno que convocamos de xeito extraordinario para reclamar unha residencia e que vai á manifestación, pero hai concelleiras dese mesmo grupo que nin foron ao pleno nin foron á manifestación e están deixando ao seu partido nunha situación un tanto comprometida”. O alcalde cre que “aquí hai xente, do BNG, de UPRI, do PSOE e tamén do PP a nivel particular que estamos poñendo os intereses de Ribadeo por enriba de calqueroutro, incluso da nosa adscripción política lexítima, e hai outras persoas que están máis buscando discrepancias entre nós e penso que é algo que non nos debemos permitir. Eu polo que ten que ver conmigo e coa miña formación política non imos entrar neste xogo”.

O rexedor dixo que “a Xunta nestes próximos días recibirá se non o ten recibido xa o documento do pleno que todos aprobamos por unanimidade cunha serie de requerimentos, de necesidades e de xustificación dunha residencia para Ribadeo e o primeiro paso era que a Xunta puxese no seu mapa autonómico de residencias á de Ribadeo, que non figura a día de hoxe”.

Suárez Barcia engadiu que “o que queda de aquí en diante é seguir traballando en unidade de acción entre todos os grupos ou en todo caso, se iso non se pode dar, entre todos os concelleiros independentemente da súa adscrición aos grupos para facerlles ver ás demáis institucións, á Deputación tamén, pero sobre todo por competencias ao goberno autonómico da necesidade de que non vamos parar no noso empeño de conseguir unha residencia adicional, maior que a que xa ten Ribadeo, por necesidade tal e como acreditamos en todos os estudios que estivemos a facer e que presentamos convenientemente”.

Pxom

O alcalde ribadense tamén se referiu hoxe ao plan xeral de ordenación municipal, “estamos continuando a dar estes pasos co que ten que ver coa información pública para garantizar a mellor difusión, a maior transparencia e a maior información posible aos veciños e aos propietarios do concello no que é esta exposición pública do PXOM. No día de onte os técnicos municipais e da empresa redactora, Eptisa, participaron nun acto público no auditorio Hernán Naval, onde tamén foron convidados todos os portavoces da comisión informativa de urbanismo, na que estivemos elaborando este documento, aína que finalmente só acudiu o portavoz de UPRI. Pero en todo o caso o máis importante foi que as máis de 80 persoas que alí acudiron puideron ter información de primeira man dos técnicos, de cales foron as cambios substanciais polos que agora se volve expoñer novamente o PXOM”.

Fernando Suárez lembrou que “ata o 8 de xuño, que é cando se remataría o prazo de exposición pública deste plan xeral aínda queda moito tempo por diante, e quero convidar a todas aquelas persoas que aínda non o fixeron que si queren poden pedir cita previa no Concello para que o arquitecto municipal os poida informar convenientemente de cómo quedan as súas parcelas, de cales son os problemas, cales son as ventaxas para que poidan ter unha información pormenorizada, que é o reto que nos marcamos desde a Corporación Municipal, non só desde o goberno senón que o resto dos portavoces tamén estaban de acordo neste tipo de información tan personalizada que estamos a facer con indepedencia que si logo a xente quere facer as alegacións sin ter en conta o criterio dos técnicos municipais é moi libre de facelo”. O rexedor animou “a que a xente pida cita no Concello, a lista agora está cuberta ata os primeiros días de maio, pero aínda quedan moitos días de aquí ao 8 de xuño, data na que remata o período de exposición pública e consecuentemente para poder presentar alegacións ao PXOM, que é un dos maiores retos que temos neste mandato e onde debe destacar unha vez máis o compromiso de todos os grupos políticos”.