O PP de Viveiro presenta unha moción relativa ao mantemento do nivel de investimento no plan de obras e servizos

O GRUPO MUNICIPAL DO PARTIDO POPULAR no Concello de Viveiro a través do seu portavoz Antonio José Bouza Rodil en base á lexislación vixente, presenta a seguinte

MOCIÓN RELATIVA AO MANTEMENTO DO NIVEL DE INVESTIMENTO NO PLAN DE OBRAS E SERVIZOS

que se basea nesta

EXPOSICIÓN DE MOTIVOS

O Goberno Central de Mariano Rajoy asumiu o poder co firme compromiso de reducir o déficit público en 2012 ata o 5,3% fronte ao 8,51% herdado dos socialistas que equivalía no 2011 a un buraco de 91.344 millóns de euros nas contas públicas e a unha débeda que alcanza os 734.961 millóns. Ante esta situación, os orzamentos deben caracterizarse polo seu realismo, a súa rigorosidade e a súa credibilidade.

Esta austeridade e necesidade de axustes á que se veu abocada o goberno central trala xestión dos socialistas, provoca que os novos presupostos inclúan que a partida íntegra do Plan de Obras e Servizos se destine a sufragar as débedas deste plan a entidades locais, pero non inclúa unha nova achega para a anualidade de 2012.

Porén isto non significa a falta de colaboración do Goberno central cos entes autonómicos e locais. Tanto é así que o financiamento local, incluídas as Deputacións, incrementouse en 1.130 millóns de euros entre 2011 e 2012, unha cantidade moi superior aos máis de 83 millóns que recollía a partida do POS no 2011. Este incremento débese a que o Goberno central aprazou as devolucións do sistema de financiamento de 2008 e 2009 de 60 a 120 meses. O Goberno non só duplicou o prazo de devolución senón que ademais incrementou a financiamento local e os instrumentos (IBI, créditos privilexiados no ICO, plan de Pago a Provedores) para que estas administración puideran financiarse.

En momentos de clara necesidade de axustes, a optimación dos recursos pasa pola coordinación e polo necesario entendemento entre administracións que evite as duplicidades na oferta de servicios e mostre cooperación. Dado isto e ante a necesidade de continuar cun plan que non só permite a mellora na calidade de vida dos lucenses senón que tamén permite xerar emprego, a actitude da Deputación provincial deberá ir encamiñada a asumir o compromiso, na medida das súas posibilidades, de evitar a reducción orzamentaria deste plan.

A Deputación provincial conta coa dispoñibilidade orzamentaria suficiente para asumir ao igual que teñen previsto as restantes Deputacións galegas a partida que non achega o Goberno central.

Así por exemplo os orzamentos da Deputación provincial recollen partidas que permitirían cumprir co obxectivo de manter o investimento do POS, tal é o caso dos máis de 2.000.000 de euros do Plan de Cooperación con Entidades Asociativas, Agrupacións e Asociacións Veciñais, plan posto en marcha durante o goberno popular na Deputación e que o PSOE e o BNG cualificaba daquela de corrupto, caciquil e clientelar. Outro exemplo do que podería botar man a Deputación é a partida do Plan de Pequenas Obras de Infraestrutura, suprimida este ano dos orzamentos e que no 2011 ascendía a máis de 1.072.000 euros. Unha cantidade esta última, que segundo argumentaron en pleno, foi reorientada ao plan de fomento do emprego, postos de traballo que se lograrían coa inversión no plan do POS.

Ante o exposto e para evitar a redución na licitación de obras públicas, propónselle ao Pleno da Corporación local a adopción dos seguintes

acordos

1.- Instar á Deputación provincial de Lugo a que reoriente unha porcentaxe da partida orzamentaria destinada ao Plan de Cooperación con Entidades Asociativas, Agrupacións e Asociacións de Veciños a manter o investimento do Plan de Obras e Servizos, evitando así a redución de obras públicas locais e conseguindo a maior eficiencia posible no emprego de recursos durante unha época caracterizada por unha difícil situación económica

O que se traslada ó Pleno da Corporación Municipal ós efectos indicados, en Viveiro, a 8 de Maio de 2012.