Economía e Industria fomenta a renovación con lousa das cubertas de edificios e vivendas

ECONOMÍA E INDUSTRIA FOMENTA CON MÁIS DE 1,5 MILLÓNS DE EUROS A
RENOVACIÓN CON LOUSA DAS CUBERTAS DOS EDIFICIOS DE VIVENDAS

Máis de 150 propietarios de vivendas unifamiliares e comunidades de veciños
poderán beneficiarse destas axudas que supoñen un 40% do total do investimento
subvencionable
O obxectivo deste novo programa é diminuír o gasto enerxético nestas construccións, co
conseguinte aforro económico, empregando este material de alta calidade

Santiago, 19 de xuño de 2012.- A Consellería de Economía e Industria vén de poñer en
marcha unha nova liña de axudas por máis de 1,5 millóns de euros coa que se fomenta
a renovación de cubertas de edificios de vivendas empregando como material a lousa,
para así diminuír o gasto enerxético nestas construccións, o que supón tamén un aforro
económico.

Poderían beneficiarse destas axudas, que cobren o 40% do total do custo subvencionable,
máis de 150 propietarios de vivendas unifamiliares e comunidades de veciños, que poden
presentar as súas solicitudes ata o 15 de xullo. Todas as actuacións de renovación de
cubertas deberán estar realizadas e pagadas entre o 1 de xaneiro deste ano e o 15 de de
novembro.

Coa creación desta nova liña de axudas que hoxe se publica no Diario Oficial de Galicia, a
Consellería de Economía e Industria apoia ás familias na renovación das cubertas ao tempo
que fomenta a utilización da lousa, un produto natural que conta cunhas características
de impermeabilidade, incombustibilidade e alto grao de inalterabilidade tanto na cor como
na súa composición, que xunto coa súa resistencia mecánica, durabilidade e capacidades
illantes a converten nun elemento de gran calidade para o seu uso como material de
cubrición, contribuíndo así á redución dos consumos enerxéticos.

Entre os custos subvencionables, dun máximo de 70 euros por metro cadrado de cuberta,
inclúense ademais dos materiais, os custos de desmontaxe das cubertas existentes e de
montaxe das novas, así como os proxectos de arquitectura ou enxeñaría necesarios e os
custos de licenzas.

Ademais de contribuír ao aforro e a eficiencia enerxética, un dos eixos estratéxicos da
actuacón da Consellería, Economía e Industria aposta pola utilización da lousa, un producto
no que Galicia é líder, producindo máis do 45% da lousa mundial para cubertas segundo
datos do sector.