O titular da Xunta presidiu, este mediodía, o acto de entrega das Bandeiras Azuis 2012
FEIJOO AFIRMA QUE OS GALEGOS PODEMOS SENTIRNOS ORGULLOSOS DE QUE, DEZ ANOS DESPOIS DO PRESTIGE, GALICIA CONTE HOXE CON MÁIS DO DOBRE DE BANDEIRAS AZUIS QUE TIÑA ANTES DO ACCIDENTE
Recoñece o esforzo colectivo para lograr que nunha de cada seis praias galegas ondee a bandeira azul
Destaca que ser unha comunidade solvente xera confianza “e a confianza –di- é un estímulo fundamental para superar as incertezas que pesan sobre España”
Lembra que neste logro teñen que ver decisións estruturais para fomentar a protección da beiramar, como as Directrices de Ordenación do Territorio ou o primeiro Plan de Ordenación do Litoral; e tamén a acción coordinada do conxunto das administracións públicas
Galicia segue, un ano máis, á cabeza das comunidades coas súas 126 praias con bandeira azul, 9 máis que en 2011. En portos, con 17 bandeiras, 4 máis que o ano pasado, ocupa o terceiro posto español
Felicita aos 36 concellos distinguidos e anima aos representantes municipais e aos cidadáns a seguir “nesta liña de atención e coidado das nosas praias, dos nosos portos e, en xeral, do noso litoral”
Foz, 22 de xuño de 2012.- O presidente da Xunta, Alberto Núñez Feijóo, afirmou este mediodía que os galegos podemos sentirnos orgullosos de que, dez anos despois do Prestige e a uns meses de celebrarse o xuízo, teñamos sido capaces de que Galicia conte hoxe con máis do dobre de bandeiras azuis que tiña antes do accidente.
Durante o acto de entrega das Bandeiras Azuis 2012, Feijóo recoñeceu o esforzo colectivo que ten feito posible que nunha de cada seis praias galegas ondee a bandeira azul porque “é –dixo- o sinal de confianza que quere mandar Galicia ao resto do mundo desde o punto de vista do turismo”. “Ser unha comunidade solvente xera confianza e a confianza, resaltou, é un estímulo fundamental para superar as incertezas que pesan sobre España”.
Ao longo da súa intervención, o responsable autonómico lembrou que neste logro teñen que ver decisións estruturais encamiñadas a fomentar a protección da beiramar, como as Directrices de Ordenación do Territorio, “as primeiras”, ou o primeiro Plan de Ordenación do Litoral; dous documentos que permitiron dotar de estabilidade normativa aos 1.500 quilómetros que configuran a costa galega e que supoñen a cuarta parte do territorio costeiro español; “e tamén –engadiu- a acción coordinada do conxunto das administracións públicas”.
En relación a este segundo punto, Feijóo subliñou que este labor coordinado fixo posible unha progresiva mellora das condicións de accesibilidade, de infraestruturas e servizos das praias galegas. “Froito dese labor coordinado e tamén dunha crecente concienciación social do valor do noso litoral, Galicia foi convertendo a regalía natural da beiramar nun referente de cantidade e de calidade de espazos costeiros axeitados para mostrar o que somos”.
O xurado internacional dos distintivos Bandeira Azul acordou concederlle a Galicia un total de 143 distincións, das que 126 corresponden a praias e 17 a portos deportivos. Na actualidade, Galicia ten contabilizadas 772 praias distribuídas entre os 84 concellos costeiros, o que equivale a case unha cuarta parte dos areais españois, e uns 122 portos e instalacións portuarias de competencia autonómica sen contar os portos de interese xeral do Estado.
O titular da Xunta destacou que Galicia segue un ano máis á cabeza das comunidades autónomas coas súas 126 praias con bandeira azul, 9 máis que no ano 2011. Mentres en portos, con 17 bandeiras, 4 máis que o ano pasado, Galicia ocupa o terceiro posto español.
Así mesmo, afirmou que todas estas bandeiras son un ingrediente de enorme importancia non só para xeneralizar a responsabilidade ambiental da sociedade, senón tamén para poder continuar mantendo o sector do turismo en parámetros estables, pese a crise económica, tal e como demostra o feito de que o número de viaxeiros que chegan a Galicia non diminuíu no que levamos de ano, fronte a unha baixada do 1,4% no total de España.
Feijóo concluíu felicitando aos 36 concellos distinguidos con estas bandeiras azuis e animando aos representantes municipais e aos cidadáns a seguir apostando por manter estes distintivos de calidade, “a seguir nesta liña de atención e coidado das nosas praias, dos nosos portos e, en xeral, do noso litoral”.
Un turismo do século XXI
No eido do turismo, Feijóo, que esta mañá tamén visitou as novas instalacións do complexo hoteleiro Las Sirenas, en Viveiro, afirmou que Galicia ten que ser un destino cunha única marca Galicia pero ben deseñada desde o punto de vista de contido. “Por iso –recordou- deseñamos unha Lei de Turismo para un turismo do século XXI e deseñamos unha Galicia dividida en 14 xeodestinos, en 14 posibilidades diferentes e unha delas é a Mariña luguesa”.
A xornada comezará ás 12:00 h cun faladoiro titulado “Vizoso e nós”, no que participarán Pepe Penabade, Pepe Blanco, Caxigueiro, Aurelia Balseiro e Mª Cristina Rubal González, moderados por Antonio Reigosa. Ás 13:20 h abrirase a exposición “Xosé Vizoso. O neno que debuxou un cabalo”, que permanecerá dispoñible durante as festas de San Lucas. A partir das 13:45 h terá lugar o acto de inauguración e descuberta da placa da nova rúa Xosé Vizoso, na Praza da Fonte Vella, coa presenza de autoridades, familiares e amizades do artista. As persoas asistentes recibirán no auditorio unha lámina cunha obra de Vizoso como agasallo.
O sindicato denuncia a decisión unilateral da empresa de retirar días de descanso e implantar quendas que dificultan a conciliación. As concentracións serán nos centros de traballo de Foz (Uxío Novoneira s/n) e Ribadeo (Avda. Galicia 27). Lémbrase que non é unha folga e apélase á solidariedade da plantilla para defender as condicións laborais conquistadas.
O evento ofrecerá mel, produtos de tempada, artesanía, gastronomía e outras propostas locais. O Concello do Valadouro mantén aberto o prazo de inscrición para persoas e empresas expositoras, que poden presentar a súa solicitude na sede electrónica ou nas oficinas do Centro Socio-cultural, Xuvenil e da Terceira Idade “Manuel Lourenzo” ata o martes 6 de outubro, ou ata completar os postos dispoñibles.
Ás 15:15 horas deste martes, un particular solicitou asistencia sanitaria tras a caída dun raio no lugar de Castro de Igrexa (Cazás, Xermade). Varias persoas sentiron os efectos da descarga eléctrica e unha delas quedou atolada. Tras dar aviso ao Servizo de Urxencias Sanitarias de Galicia-061, Garda Civil e Protección Civil, a persoa afectada foi evacuada consciente ao Hospital Universitario Lucus Augusti.
A exposición, instalada no Centro Comarcal Pazo de San Tomé, invita a observar con calma, descubrir historias e poñer en valor un patrimonio vivo que forma parte da nosa identidade. Unha maneira diferente de achegarnos ao mundo rural que tanto significa para As San Lucas.
A viaxe, enmarcada no proxecto «Relevo Xeracional: O Futuro do Mar» e organizada en colaboración co GALP Itsas Garapen Elkartea, permitiu achegarse a iniciativas como Kofradia Basque Seafood, a Escola de Pesca de Ondarroa, AZTI, Albaola ou o Itsas Museo de Donosti, así como a proxectos vinculados directamente á actividade pesqueira e á divulgación, incluíndo o uso de realidade virtual. O intercambio con Euskadi permitiu coñecer modelos que combinan formación, investigación, transmisión do coñecemento e modernización do sector, contribuíndo a identificar novas vías para facilitar a incorporación da mocidade á actividade pesqueira e garantir a continuidade das comunidades costeiras galegas.
Os servizos sanitarios trasladaron ao hospital a tres persoas implicadas nunha colisión frontal en Castro de Rei. Unha delas tivo que ser excarcerada polos Bombeiros de Vilalba. Contra as 11:15 horas deste martes, un particular informou ao 112 Galicia dun choque entre dous vehículos no quilómetro 71 da N-640, á altura da parroquia de Viladonga. Desde o punto, os alertadores sinalaron que unha persoa permanecía atrapada. Desde o Centro Integrado de Atención ás Emerxencias activouse un operativo no que participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada. Os bombeiros liberaron á persoa, que foi trasladada xunto con outros dous feridos ao hospital en ambulancia.
