ANTONIO VEIGA RECÓRDALLE AO ALCALDE DE BARREIROS QUE É A XUNTA QUEN NON DÁ DIÑEIRO AO CONCELLO PARA CULTURA E BENESTAR SOCIAL
Antonio Veiga respondeu ás críticas vertidas aos medios polo alcalde de Barreiros esta mañá
Veiga afirmou que “na mesa de valoración das subvencións había un representante do PP e non houbo ningún voto en contra nin alegacións”
Antonio Veiga afirma que “isto demostra a estratexia do PP: tapar o que realmente se esconde detrás, que é a ausencia de axudas ás asociacións culturais e ao Servizo de Axuda no Fogar”
Lugo, 6 de xullo de 2012. O vicepresidente da Deputación de Lugo, o nacionalista Antonio Veiga, respondeu ás críticas vertidas aos medios de comunicación esta mañá por parte do alcalde de Barreiros, nas que acusaba á Deputación de destinar máis cartos á cultura que ao benestar social no Concello de Barreiros, afirmando que “o que realmente está a acontecer, e o alcalde de Barreiros trata de tapar, é que hai unha administración, a Xunta de Galiza, que non aporta nin un euro aos colectivos culturais nin ao propio concello para a prestación do Servizo da Axuda no Fogar e, desgrazadamente, é a Deputación quen unicamente aporta diñeiro para cubrir este tipo de iniciativas e servizos. Isto denota claramente cal é a estratexia do PP, vistas as declaracións tamén en días pasados do sr. Balseiro, que manifestan un claro nerviosismo no seo do PP pola nula xestión que están a facer, desfacendo o sistema de benestar e sumindo á sociedade máis aínda na pobreza con recortes tras recortes”.
No tocante aos criterios de concesión de subvencións a entidades culturais, axudas que se aprobaron hoxe en Xunta de Goberno, o vicepresidente da Deputación foi moi claro: “existen uns baremos e criterios que son públicos, coñecidos e obxectivos para a valoración dos proxectos presentados e convócase unha mesa de valoración destas axudas, que tivo lugar o martes pasado, na que participan os tres grupos políticos con representación na Deputación de Lugo, polo que non se poden entender agora estas queixas cando nesa mesa de valoración non houbo ningún voto en contra nin se presentaron alegacións de ningún tipo. Na Deputación existen uns criterios que afondan na xustiza, transparencia e legalidade para este tipo de convocatorias, algo do que seguramente adoece de aplicar o Concello de Barreiros. Ademais, non é de recibo que o alcalde de Barreiros manexe unha información que non podería manexar, xa que estas axudas non se aprobaron até que se celebrou a Xunta de Goberno, porque é este o órgano competente para aprobalas, e as cantidades correspondentes a cada asociación non son públicas até ese momento”.
Por último, Antonio Veiga esixiulle ao alcalde de Barreiros “respecto ás persoas que desinteresadamente participan en colectivos culturais e que ocupan parte do seu tempo en iniciativas que dinamizan o pobo e o que non debería facer é poñer unha etiqueta de esta asociación é de tal ou cal partido”.
Dez minutos antes das 21:30 horas do xoves, o 112 Galicia foi informado polo persoal de Adif dun tren detido no medio dun túnel en Mogor, Mañón, debido a unha chapa metálica no medio da vía. Así, aínda que as doce persoas que viaxaban a bordo estaban ilesas, precisaban medios de rescate para baixalas do convoi e desprazalas ata o apeadeiro máis próximo. Nestas tarefas colaboraron a Garda Civil, os Bombeiros do Eume, o GES de Ortigueira e os voluntarios de Protección Civil de Mañón. Finalmente, as persoas foron rescatadas e evacuadas a outro tren, que as levou ata o apeadeiro sen maiores complicacións. Desde alí, continuaron a súa viaxe en taxi.
Competirán durante tres días xunto a outras dezaseis escolas de todo o mundo, elaborando catro propostas de pizza: Polbo á galega, con polbo galego, queixo San Simón e allada picante; Bosque galego, con crema de castañas e mel picante; Terra meiga, con zorza picante; e Rapadoira, con setas, queixo azul e pera. As estudantes viaxan acompañadas pola súa profesora, Conchi Carreiras, coa que levan tempo preparando as receitas. Esta é a terceira participación do IES de Foz neste certame, no que xa acadaron un segundo posto en edicións anteriores. A actividade forma parte do programa Erasmus+ da FP, financiado pola Unión Europea, que facilita a participación do alumnado en competicións de habilidades profesionais por toda Europa.
A xornada comezará ás 12:00 h cun faladoiro titulado “Vizoso e nós”, no que participarán Pepe Penabade, Pepe Blanco, Caxigueiro, Aurelia Balseiro e Mª Cristina Rubal González, moderados por Antonio Reigosa. Ás 13:20 h abrirase a exposición “Xosé Vizoso. O neno que debuxou un cabalo”, que permanecerá dispoñible durante as festas de San Lucas. A partir das 13:45 h terá lugar o acto de inauguración e descuberta da placa da nova rúa Xosé Vizoso, na Praza da Fonte Vella, coa presenza de autoridades, familiares e amizades do artista. As persoas asistentes recibirán no auditorio unha lámina cunha obra de Vizoso como agasallo.
Ás 15:15 horas deste martes, un particular solicitou asistencia sanitaria tras a caída dun raio no lugar de Castro de Igrexa (Cazás, Xermade). Varias persoas sentiron os efectos da descarga eléctrica e unha delas quedou atolada. Tras dar aviso ao Servizo de Urxencias Sanitarias de Galicia-061, Garda Civil e Protección Civil, a persoa afectada foi evacuada consciente ao Hospital Universitario Lucus Augusti.
A exposición, instalada no Centro Comarcal Pazo de San Tomé, invita a observar con calma, descubrir historias e poñer en valor un patrimonio vivo que forma parte da nosa identidade. Unha maneira diferente de achegarnos ao mundo rural que tanto significa para As San Lucas.
Co sol ocultándose e a lúa asomando entre as torres de Donlebún, o músico e divulgador reivindicou o poder evocador e transformador do bravú fronte á morriña paralizante. Na sala de lectura da biblioteca, Souto explicou a evolución do rock bravú no imaxinario galego, evocando as músicas populares que acompañaron durante décadas os remolques dos pascualiños e os labores comunitarios, e lembrando a vitalidade de grupos como Skornabois, Diplomáticos de Monte Alto, Xenreira, Zënzar, Pinto de Herbón ou os Rastreiros. A boa lembranza da súa anterior visita levou ao artista a pechar a velada interpretando o “Himno de Ribadeo”, composto por Arturo Mogo, nun final cheo de afecto pola vila e pola súa identidade cultural.
A viaxe, enmarcada no proxecto «Relevo Xeracional: O Futuro do Mar» e organizada en colaboración co GALP Itsas Garapen Elkartea, permitiu achegarse a iniciativas como Kofradia Basque Seafood, a Escola de Pesca de Ondarroa, AZTI, Albaola ou o Itsas Museo de Donosti, así como a proxectos vinculados directamente á actividade pesqueira e á divulgación, incluíndo o uso de realidade virtual. O intercambio con Euskadi permitiu coñecer modelos que combinan formación, investigación, transmisión do coñecemento e modernización do sector, contribuíndo a identificar novas vías para facilitar a incorporación da mocidade á actividade pesqueira e garantir a continuidade das comunidades costeiras galegas.
