384 propietarios de fincas afectadas pola concentración parcelaria de Ourol xa dispoñen dos títulos de propiedade

A conselleira do Medio Rural e do Mar fixo entrega dos títulos de propiedade da zona de concentración parcelaria de Miñotos, neste concello lugués

ROSA QUINTANA DESTACA QUE A PARCELARIA DE OUROL MELLORARÁ AS INFRAESTRUTURAS E O NIVEL ECONÓMICO DA ZONA

 A titular de Medio Rural e Mar lembrou tamén que estes procesos contribúen a mellorar e modernizar as explotacións agrícolas, así como as vías de comunicación e de acceso a novas fincas

 Esta parcelaria supón a reorganización de 3.871 parcelas en 820 fincas pertencentes a 384 propietarios e nela investíronse máis de 2,6 millóns de euros

Ourol (Lugo), 7 de xullo de 2012.- A conselleira do Medio Rural e do Mar, Rosa Quintana, acompañada polo director xeral de Desenvolvemento Rural, Antonio Crespo, fixo hoxe entrega dos títulos de propiedade da zona de concentración parcelaria de Miñotos, no concello lugués de Ourol.

Rosa Quintana destacou neste acto as vantaxes dos procesos de concentración parcelaria, posto que melloran as infraestruturas e o nivel económico da zona e supoñen a reordenación das propiedades. A titular de Medio Rural e Mar lembrou tamén que este tipo de reorganización do territorio axuda a facer máis viables as explotacións agrícolas, mellorando as vías de comunicación e de acceso a novas fincas e contribuíndo a aumentar a capacidade produtiva do agro.

Reorganización da propiedade

Neste caso concreto, a concentración parcelaria da zona de Miñotos supuxo a reorganización de 3.871 parcelas en 820 fincas, pertencentes a 384 propietarios. O orzamento investido dende o inicio deste proceso supera os 2,6 millóns de euros, dos cales a meirande parte foron destinados á execución da rede de camiños principais e ao acondicionamento de fincas.

Outras obras na zona

O departamento que dirixe Rosa Quintana ten executadas outras obras neste concello lugués de Ourol, entre elas as que se enmarcan nos Proxectos Estratéxicos de Infraestruturas no Medio Rural (PEIM). Así, no ano 2009 procedeuse á mellora de camiños no municipio cun orzamento superior aos 100.000 euros; no 2010 realizouse o acondicionamento do firme no camiño de Lobeiras-Bullo por máis de 38.000 euros. O programa PEIM para o presente ano ten un orzamento de preto de 76.000 euros, para executar en diferentes obras.