Queremos galego destaca que a ampla adhesión á manifestación do domingo 27 é mostra da “unanimidade” a prol do galego

TODA A SOCIEDADE GALEGA ORGANIZADA AGÁS O PP MOSTRA O SEU APOIO Á MANIFESTACIÓN POLA LINGUA QUE NOS UNE.

A ampla adhesión á manifestación que terá lugar o domingo 27 de xaneiro é mostra da unanimidade a prol do galego.

O portavoz da plataforma e presidente da Mesa pola Normalización Lingüística Carlos Callón fará unhas declaracións ás 12.00 na Porta Faxeira.

Santiago de compostela, 25 de xaneiro-. Ademais dos máis de 700 colectivos e entidades sociais que forman parte da plataforma cidadá Queremos Galego, todas as organizacións con representación parlamentar, agás o PP, fixeron chegar o seu apoio á manifestación que so o lema Pola lingua que nos une. Queremos galego na escola, percorrerá as rúas da capital de Galiza.

Para a plataforma cidadá Queremos Galego, isto é unha mostra máis da situación de aillamento social en torno á lingua galega na que se atopa o PP nestes momentos e que debería motivar unha reflexión profunda dos seus dirixentes. A plataforma lembra que xunto cos ataques continuados á nosa lingua evidenciados incluso pola sentenza do TSXG que declara ilegais os puntos centrais do decretazo contra o galego, ou o recente proxecto de LOMCE (máis coñecida como Lei da Wertgoña), pretenderon pór trabas á unha manifestación como a do domingo a través da imposición dunha fianza pola colocación dun palco, decisión que será recurrida pola plataforma nos tribunais, e que é unha mostra máis do sectarismo dos dirixentes do PP, especialmente agresivo contra a lingua galega.

A manifestación sairá ás 12.00 da Alameda compostelá para rematar na Praza da Quintana, onde ademais dunha intervención do portavoz de Queremos Galego e presidente da Mesa pola Normalización Lingüística, Carlos Callón, diferentes personalidades do ámbito cultural e educativo lerán o manifesto Queremos galego na escola: Luís Iglesia (actor), Xurxo Souto (músico), Mercedes Queixas (escritora e pofesora), Marta Dacosta (escritora e profesora), Antón Freire (alumno de 4º da ESO), Susana Méndez (coordinadora de Queremos Galego). No acto haberá intervención musicais a cargo das cantantes Uxía e Ses, e será conducido polo actor Pepe Penabade.