Arranca a segunda fase do Plan de roza das estradas de titularidade provincial

A Deputación comezou este luns 15 de xullo a segunda fase do plan de roza na rede viaria provincial, arrancando estes traballos nos Concellos de Guitiriz, Begonte, Rábade, Cospeito, Outeiro de Rei, Fonsagrada, Negueira de Muñiz, Friol, Guntín, Lugo, O Corgo, Becerreá, Baleira, Navia de Suarna, Paradela, Portomarín, Sarria, Láncara, O Páramo, Monforte de Lemos e Pobra de Brollón. Estes 21 municipios súmanse así ós outros 25 onde xa comezaran estas tarefas.

Da mesma forma, o martes 16 de xullo, incorporaranse ó plan os Concellos de Baralla, Cervantes, As Nogais e Triacastela. A Deputación ten disposto para este plan de roza un total de 70 operarios e 50 máquinas que, de xeito progresivo, irán actuando nos 67 Concellos lugueses polos que discorren os 4.300 quilómetros de vías provinciais.

Para desenvolver o plan de roza, a Deputación contratou estas actuacións a 23 autónomos e pequenas empresas da provincia, precisamente, para potenciar os seus negocios, contribuíndo ó impulso da economía e ó mantemento de postos de traballo en Lugo ante a crise.

Os traballos de roza das estradas deron comezo a principios deste mes, xa que levar a cabo estes traballos con anterioridade, suporía segundo os técnicos da Deputación e tendo en conta as condicións metereolóxicas, a súa dobre execución. Como en anteriores anualidades, o organismo provincial pon en marcha estas actuacións na tempada estival co obxectivo de previr incendios e aforrar custes.

A Deputación inviste nestes traballos 600.000 euros, con cargo ós fondos provinciais que achega á conservación da que é a rede viaria provincial máis extensa de España.