A Deputación demandará do Goberno central que manteña a asistencia sanitaria ás persoas que permanezan fóra do Estado máis de 90 días

Lugo, 25 de febreiro de 2014. A Deputación de Lugo, logo do pleno celebrado este martes e a instancias dunha proposta do BNG que se aprobou cos votos a favor dos dous socios de goberno e cos votos en contra do PP, instará á Xunta de Galiza a que demande do Goberno do Estado a derrogación da eliminación do dereito á asistencia sanitaria, das persoas que permanezan máis de noventa días fóra do Estado nun ano natural ou non residentes no Estado Español, adoptada polo Goberno do Estado no Real Decreto – Lei 16/2012. Nesta liña, a institución provincial esixirá á Xunta de Galiza a que, mentres non se proceda a derrogar este Decreto, asuma e garanta a atención sanitaria das galegas e dos galegos que se atopen nesa situación, conservando a súa tarxeta sanitaria.

O portavoz do BNG na Deputación, Mario Outeiro, afirmou que “desde que accedeu ao goberno do Estado, o PP está a acometer unha vaga de recortes en dereitos e conquistas sociais sen precedentes. Entre elas, a medida coa que eliminou o dereito á atención sanitaria universal, ficando recoñecida só para quen resida no Estado, polo que se lle nega dito dereito a todas as persoas que permanezan fóra do Estado español máis de 90 días nun ano natural, que neste momento son moitas por motivos laborais, debido tamén ás nefastas políticas económicas do PP que están a devastar os nosos sectores produtivos e a aniquilar a capacidade de xerar emprego en Galiza”.

“Unhas políticas – continuou Outeiro – que obrigan a miles de mozos e mozas, que padeceron xa o ano pasado un desemprego superior ao 50%, a saír do Estado español para atopar traballo. Un novo recorte de dereitos que afecta especialmente a Galiza e aos miles de galegos e galegas que se ven obrigados a emigrar para escapar da crecente situación de miseria que afecta ao noso País, con máis de 90.000 fogares con todos os seus membros sen emprego”.

Mantemento do Servizo Galego de Apoio á Mobilidade Persoal – 065
Asemade, tamén se aprobou esixir do goberno da Xunta de Galiza o mantemento do Servizo galego de Apoio á Mobilidade Persoal – 065- por parte da Consellaría de Traballo e Benestar, para seguir prestando o servizo de transporte adaptado a todas as persoas con dificultades de mobilidade, así como aos colectivos de persoas con capacidades diferentes, que o necesiten e o demanden no País.

A este respecto, o portavoz do BNG argumentou que “a modificación do Servizo Galego de Apoio á Mobilidade Persoal -065- por parte da Consellaría de Traballo e Benestar é un novo paso na eliminación dos programas de dependencia e benestar. A Xunta pretende deixar de prestar o servizo de traslado diario ou semanal dos dependentes aos centros para realizar as terapias”, e lembrou que “o Consorcio de Benestar terá o seu propio transporte para as persoas dependentes usuarias dos seus centros”.

“Unha vez máis, a Consellaría de Traballo e Benestar desmantela un servizo necesario, como é o de transporte adaptado, que custou moito esforzo deseñar e implantar e que daba servizo de xeito regular aos dependentes que así o solicitaran. De novo, fálase de racionalización e eficacia por parte do Goberno galego cando deberíase dicir desmantelamento do servizo de 065” – insistiu Mario Outeiro.

Sogama
A Deputación de Lugo tamén manifestou o seu rexeitamento ao canon de Sogama, en solidariedade coa Administración Local, aprobando, co apoio do Grupo Provincial do BNG, e co voto en contra do PP, esixir a súa inmediata retirada por parte da Xunta de Galiza.

Para o BNG, esta proposta de incremento desmesurado dos custos de tratamento de lixo por parte de Sogama vén a confirmar as denuncias feitas con anterioridade polo BNG sobre o fracaso do proxecto de Sogama e o Plano de Residuos Sólidos urbanos implantado polo PP na Xunta de Galiza.

Neste sentido, Antonio Veiga afirmou que “a verdadeira razón da suba do canon non ten que ver coa relación entre os concellos e Sogama, como nos quere facer crer o PP, pois esta suba obedece a unha decisión política adoptada polo goberno central do PP na súa reforma do sector eléctrico que impón recortes nas tarifas para percibir pola coxeración eléctrica, e agora ante a caída de ingresos que sufrirá Sogama pola xeración de enerxía, óptase por cargarlle á cidadanía novamente este recorte en lugar de facelo sobre os beneficios das empresas xeradoras de enerxía”.

Veiga precisou que “unha vez máis o PP sitúase ao lado das grandes empresas enerxéticas, penalizando as fontes de xeración alternativas e afogando máis aínda aos concellos e aos contribuíntes” e insistiu “na vergoñenta postura dos alcaldes do PP de Lugo, moitos deles deputados provinciais tamén, que calan a boca diante das medidas inxustas que ditan desde o seu propio partido, o Partido Popular”.

O Bloque Nacionalista Galego reiterase neste Pleno Provincial no seu rexeitamento ao “taxazo” de Sogama imposto pola Xunta de Galiza, así como a súa aposta por un modelo de xestión de lixo alternativo que aposte pola redución, reciclaxe e reutilización; un servizo que aposte tamén pola comarcalización de cara a reducir o transporte e, en consecuencia, o impacto económico e ambiental.