A CIG Saúde asegura que “a Sanidade de Feijóo derrúbase” tralo desprendemento do teito nunha área do Hospital da Costa

Este mércores pola mañá tivo lugar un derrubamento do teito na área de consultas externas do Hospital da Costa en Burela. Afortunadamente non houbo que lamentar danos persoais nunha zona e hora con grande afluencia de usuarios e usuarias que se atopaban nas consultas.

CIG Saúde A Mariña, que fixo público o accidente, alerta de que o contratempo “puido rematar en desgraza a unha hora onde os corredores de consultas estaban abarrotados de pacientes”. Ese sindicato atribúe o ocorrido a que o hospital da Mariña lucense, “con case 30 anos de vida, non se coida”, a unhas políticas neoliberais agresivas, que buscan a deterioración e desmantelamento progresivo da sanidade pública en beneficio da empresa privada así como a unha re-centralización da atención sanitaria nas grandes cidades.

O Hospital mariñao que atende a preto de 70.000 habitantes, necesita con urxencia unha reforma integral e unha ampliación, prometida en máis de nove ocasións por Alberto Núñez Feijóo e que continua sen facerse unha realidade, coa complicidade dos Alcaldes e cargos do PP da Mariña que no seu día defenderon a entrega e o control do Hospital da Costa a Lugo a pesar da forte contestación social de organizacións sindicais, plataformas sanitarias, partidos políticos, agás o PP, asociacións de veciños e outras entidades e organizacións.

A estas horas continua sen arranxarse o teito das consultas, permanecendo unha parte apuntalada por risco de derrubamento pero non obstante non está acordoada a zona permanecendo de libre acceso aos pacientes e traballadores/as.

Ao mesmo tempo hoxe comezan os actos de protesta diante da porta do Xerente do Hospital da Costa, contra a deterioración da sanidade pública, contra as privatizacións de mantemento, electromedicina, esterilización, contra o ERE encuberto na sanidade pública de Galiza e contra a deterioración do Hospital da Costa e os Centros de Saúde da Mariña.