O BNG critica que “o PP de Burela utiliza a Escola de Música para perseguir e castigar aos traballadores que non comulgan coa súa xestión”

O Xulgado do Social de Lugo ven de dictar Sentenza pola que se condena ao Concello de Burela a repoñer a dous traballadores da Escola de Música nas condicións de traballo anteriores á modificación laboral practicada polo Concello. Estes dous profesores sofreran no mes de marzo unha redución substancial da súa xornada laboral (de 14 a 7 horas e de 15 a 5 horas semanais respectivamente), a proposta da propia Dirección do centro e que derivou nun Informe da Concelleira de Cultura, Mónica Pedre e nun Decreto da Alcaldía.

O Xulgado do Social xa emitira no mes de agosto sentenza favorable a un dos profesores, á que agora se suma unha nova sentenza a favor do segundo traballador afectado. A sentenza non só considera inxustificada a decisión do Concello de reducir a xornada laboral a estes profesores, se non que tamén recoñece que se “vulnerou a garantía de indemnidade”, así como a “existencia dunha vontade de represalia” por parte do Concello.

O BNG xa denunciara publicamente esta situación no seu día e cualifica de gravísima a decisión do Concello ao “actuar de forma improcedente e vulnerando dereitos dos traballadores, reducindo a súa xornada sen xustificación laboral algunha e respondendo, exclusivamente, a unha vontade criminalizadora e represiva do goberno do Partido Popular contra quen ten defendido o seu posto de traballo”.

O BNG pedirá a dimisión da Concelleira de Cultura, pola súa responsabilidade directa neste asunto
Desde o BNG sinalan que pedirán responsabilidades políticas do goberno municipal e, en concreto a dimisión da Concelleira de Cultura, Mónica Pedre, como responsable de emitir o informe que derivou na precarización das condicións laborais dos traballadores, tomando como base outro informe da propia Dirección da Escola de Música no que se propoñía a redución da xornada dos dous traballadores cos que mantiña unha “tensa relación”, como recolle a propia sentenza.

Igualmente, o grupo municipal do BNG esixirá o inmediato cumprimento das decisións xudiciais e que, en base ás mesmas, se repoña a xornada de traballo aos dous profesores da Escola de Música, tal como se recolle na propia sentenza. Neste sentido, o alcalde deberá explicar por que a día de hoxe aínda non se repuxo aos dous profesores e que medidas se van adoptar con respecto á Dirección do centro, depois de terse negado a repór o horario lectivo destes profesores e chegando mesmo a pór en cuestión a propia resolución xudicial.

Desde o BNG tamén tachan de “demagóxica” a actitude do goberno municipal a respecto das ensinanzas de música municipais e a súa aposta por crear novas formacións que substitúan ás existentes só polo simple feito de non gostar do actual profesorado, abandonando así o traballo de base que se ten feito tanto desde a Escola Municipal como desde a Banda de Burela e a Burela Blues Band.