ANPAS galegas apoia a manifestación deste domingo en defensa do galego

O vindeiro 8 de febreiro, a Plataforma QUEREMOS GALEGO ten convocada unha manifestación en defensa do galego. “A esa manifestación estamos convocados todos e todas, todas as ideoloxías, todos os partidos, todo aquel que non estea de acordo co trato que se lle está a dar á nosa lingua está chamado a se manifestar o próximo domingo”, aseguran dende a Confederación de ANPAS galegas.

Dende a FAPACEL amosan o seu público apoio a esta convocatoria; polo que convidan a “sumarnos á mesma solicitando a todos os nosos asociados, e ao resto da cidadanía, a súa participación activa xunto cos demais galegos e galegas que volveremos a dicir que a Lingua é nosa, e que non imos permitir que nola aldraxen como o están a facer”.

“Dende o noso ámbito de actuación defendemos sempre a necesidade de que Galicia conte cun ensino público en galego, tanto na lingua de expresión, que debe ser vehicular en todas as materias comúns agás, loxicamente, do ensino doutras linguas, como na fixación dos currícula”, continúan.

“A nosa infancia e mocidade teñen que aprender cal é a nosa realidade, a nosa cultura, a nosa identidade, e iso teñen que o aprender en galego porque é a lingua que inventamos para describirnos, é a lingua que nos define e que nos acubilla”, afirman.

Por iso, “nós defendemos que o noso idioma ten que ter un trato absolutamente preferente nos plans educativos galegos, que debemos potenciar o seu uso maioritario no ensino galego, para que os que veñen detrás de nós o dominen, o coñezan, o utilicen e, por riba de todo, sintan por el o cariño, veneración e respecto que merece o maior dos nosos patrimonios: a Nosa Lingua”.

POLAS FILLAS DOS NOSOS FILLOS.