Aberta de novo a pista de skate de Foz tralas obras de reparación

Foz, 27 de abril de 2015. A pista de skate situada na zona portuaria de Foz está aberta de novo dende este luns, despois das obras de reparación executadas nesa instalación deportiva con fondos propios do Concello focense, que fixo un investimento de 10.000 euros.

O alcalde, Javier Jorge Castiñeira, informou “a todos aqueles, rapaces e non tanto, que usan a pista de skate, que dende hoxe está de novo aberta, porque fixéronse obras de mellora, sobre todo nas ramplas e demais mobiliario, que estaba nunhas condicións bastante malas, fundamentalmente nas xuntas, pero tamén había descascados e incluso fochas que eran perigosas para a actividade do skate. E quedamos ben contentos do resultado final das obras porque se remataron moi ben todas as xuntas, que era o máis difícil, e déuselle unha capa de pintura con resinas que fai que o pavimento estea en moito mellores condicións. O que nos desexábamos era que todos aqueles skaters que usan esa pista poidan facelo nunhas mellores condicións”.

O rexedor municipal tamén explicou que “a pista levaba moito tempo sen facerlle reparacións, pero agora foi posible acometer esta obra grazas á estabilidade económica que ten hoxe en día o Concello de Foz e porque se aprobaron uns orzamentos para este ano 2015 que permiten que se fagan investimentos en diferentes lugares que non podían acometerse mentres non houbera uns orzamentos actualizados. Hai que recordar que durante todos estes anos anteriores estivemos traballando cuns orzamentos prorrogados posto que non había maioría na corporación municipal para aprobalos. E agora estamos contentos porque se están facendo unha serie de obras que eran completamente necesarias e grazas a esa estabilidade económica que ten agora o Concello de Foz, sen débedas cos bancos e pagando aos provedores, poden acometerse certos investimentos en infraestruturas como son neste caso instalacións deportivas para o skate, pero estase arranxando tamén a pista do Campo da Cabana, vanse facer ademais melloras no alumeado do campo de fútbol municipal e unha beirarrúa perimetral demandada por todos os colectivos. E vamos tratar tamén de dotar ao pavillón municipal dun novo marcador, xa que o actual leva moitos anos nunhas condicións bastante malas e isto é algo que nos demandan os clubs que o usan”.