A MARIÑA .- O vindeiro mércores día 30 conclúe o prazo de inscrición na actividade “OLLADAS DE MULLERES, VISIÓNS DESDE A MARIÑA”, organizada polo Observatorio da Mariña pola Igualdade, contando coa colaboración dos concellos de Barreiros, Burela, Mondoñedo e Riotorto. Co obxectivo de contribuír ao empoderamento das mulleres a través da fotografía, a actividade desenvolverase a partir do mes de outubro nestes diferentes localidades, polo que na inscrición terán preferencia as mulleres censadas nestes concellos así como as socias do Observatorio, estas últimas independentemente de onde residan.
O procedemento para anotarse, sempre antes do día 30 de setembro, difire segundo o concello no que se desexe realizar a actividade. Así, en Burela e Mondoñedo as inscricións realizaranse no Centro de Información ás Mulleres, cuxos teléfonos de contacto son respectivamente 982580609 (Burela) e 982521369 (Mondoñedo). En Barreiros as inscricións deben realizarse no Centro Municipal de Información Xuvenil (982124106), e en Riotorto chamando aos teléfonos 629028702 ou 663617406. O custe da actividade é de 10 euros para aquelas mulleres que non sexan socias do Observatorio, e no momento da inscrición as participantes deben indicar se posúen cámara fotográfica dixital propia, xa que o Observatorio conta cun número moi limitados de cámaras para emprestar. O número de prazas está limitado a 15 mulleres en cada localidade.
A actividade “OLLADAS DE MULLERES, VISIÓNS DESDE A MARIÑA” consta de tres partes. A primeira consiste nun obradoiro de fotografía dixital, impartido polas fotógrafas mariñás Marián García Mesa e Lucía Valea. Neste obradoiro abordarase a historia da fotografía desde unha perspectiva de xénero repasando as contribucións de fotógrafas internacionais e galegas, cuestións técnicas da fotografía dixital e diferenzas coa analóxica, formación de imaxe, toma fotográfica, diferentes motivos fotográficos, presentación de imaxe para publicación, o retoque de imaxes antigas, o proceso práctica de descarga e almacenamento de imaxes en ordenador, o tratamento de imaxes con programas de ordenador, etc. Nas diferentes localidades, os cursos desenvolveranse nas seguintes datas:
► BURELA: os venres a partir do 2 de outubro, en horario de 16 a 19 horas (durante 6 venres)
► MONDOÑEDO: os sábados a partir do 3 de outubro, en horario de 10 a 13 horas (durante 6 sábados)
► RIOTORTO: os sábados a partir do 3 de outubro, en horario de 16 a 18 horas (durante 9 sábados)
► BARREIROS: os luns a partir do 19 de outubro, en horario de 17 a 19 horas (durante 9 luns)
[No caso de Barreiros, o prazo de inscrición manterase aberto até o día 15 de outubro]
A segunda parte de OLLADAS DE MULLERES consiste nun período de exercicio individual no que as mulleres porán en práctica os coñecementos adquiridos fotografando a súa realidade cotiá, fomentando deste xeito a realización de actividades participativas para as mulleres que valorizan o seu papel na sociedade. Logo deste período poranse en común todas as fotografías realizadas por todas as participantes, quen decidirán de forma participativa cales son as mellores fotografías de cada unha. Con estas fotografías seleccionadas darase paso á terceira parte da actividade, consistente na realización dunha exposición fotográfica en cada concello. Posteriormente, o colofón da actividade será unha exposición final conxunta, de forma que así se poidan apreciar as realidades cotiás tan distintas que arrodean as experiencias vitais das mariñás de concellos costeiros como Barreiros ou Burela, e de concellos do interior como Riotorto ou Mondoñedo.
Para calquera dúbida ou aclaración, o Observatorio da Mariña pola Igualdade pon a disposición das interesadas o teléfono 663617406 e o correo electrónico observatorioigualdade@gmail.com
A actividade “OLLADAS DE MULLERES. VISIÓNS DESDE A MARIÑA” xorde como continuación dunha primeira iniciativa semellante impulsada tamén polo Observatorio da Mariña pola Igualdade en colaboración cos concellos de Ribadeo, Vilar de Santos e a Illa de Arousa no ano 2007. Co título de “Olladas de Muller, lapis de homes”, concluíra cunha exposición no Museo Verbum de Vigo. Posteriormente, a exposición viaxara até o Forte de San Damián ribadense do 2 ao 14 de xullo de 2008, onde se puideron ver as imaxes das 36 mulleres participantes impresas sobre sabas penduradas dun tendal con pinzas de roupa, acompañadas de comentarios realizados por lapis de homes. (Poden ver máis información en http://www.vieiros.com/nova/65287/olladas-de-muller-e-lapis-de-home).
Dada a boa acollida da actividade, como asociación de ámbito comarcal, desde o Observatorio da Mariña pola Igualdade queremos contribuír a consolidar un proxecto participativo coma este no que as mulleres son as protagonistas e quen toman as decisións.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
A programación arrancará de 13:00 a 15:00 horas cos pinchos de benvida e unha sesión vermú a cargo do DJ Peabody. A continuación, de 15:00 a 17:00 horas, terá lugar a comida na Finca San Antonio, cun menú composto por salpicón de rape e langostinos, codillo con patacas, pan, postre, café, chupito e bebida incluída. Os tickets teñen un prezo de 40 euros e poden adquirirse en O Rincón, Confitería Alianza, Comercial Anjor e Perruquería Oriola; os menores de 5 anos asistirán de balde e os de 6 a 10 anos contan cun desconto do 50 %. Xa a partires das 18.30 horas haberá sesión de música con Toxo Guayaba.
