Alfredo Llano mantivo encontros en Lugo coa xefa territorial de Educación e cos responsables de Costas e de Fomento na provincia

Burela, 11 de setembro de 2015.- O alcalde, Alfredo Llano, mantivo encontros en Lugo coa xefa territorial de Educación e cos responsables provincias de Costas e de Fomento, cos que analizou diversas cuestións de interese para os veciños e as veciñas de Burela.

O rexedor relatou que este xoves “dediquei practicamente todo o día a facer visitas en Lugo a diferentes institucións e departamentos para falar de cuestións que nos importan en Burela. Por exemplo fun a Educación para entrevistarme coa xefa territorial, fundamentalmente porque agora hai unha modificación no comedor do colexio Vista Alegre. Pensamos que non se colaborou co Concello suficientemente porque non se informou puntualmente de como se estaban levando a cabo os trámites para este comedor. Nosoutros tíñamos e temos persoal que se está facendo cargo de momento do comedor e sen embargo nin a empresa nin a propia Xunta nos foi informando puntualmente do que tiña pensado facer con respecto a este tema. Tamén falamos sobre as obras que se están facendo no IES Perdouro e ademais comentamos como están as matrículas nos centros do noso concello, aspecto no que non hai ningún problema”.

Alfredo Llano visitou tamén ao responsable provincial de Costas “para abordar varios asuntos; un deles é unha cuestión que xa está en marcha, que é un monólito dedicado ao Cabo Burela que xa sabemos onde se vai colocar, que é no paseo marítimo e nel vai figurar unha lenda, unha rosa dos ventos e ademais a latitude e a lonxitude correspondente ao sitio exacto onde vamos situalo. Tamén estivemos falando sobre o mantemento que corresponde facer xa a partir de agora no paseo marítimo; entonces vamos facer varias obras e tamén imos rematar unha moi demandada na praia de Ril, que é nunha baixada na que hai para favorecer o acceso ao areal a discapacitados e a persoas maiores. Outra obra moi necesaria, sobre todo para cando hai inundacións por choivas torrenciais, está no paseo marítimo do Cantiño. Preocupa moito porque cando chove con forza ocorre sempre que aparte de estragar parte do paseo tamén crea problemas aos veciños dese lugar porque se acumula gran cantidade de auga, polo que temos que mirar unha fórmula para que iso non ocorra no futuro; é algo que xa vamos analizar concretamente para a semana que vén. E tamén no Cantiño houbo un derrube importante na praia, xa que caeu parte dunha parede do acantilado; isto preocupa e entón vamos analizar como está de estabilidade esa parte da praia do Cantiño”.

Alfredo Llano tamén mantivo unha xuntanza con responsables de Fomento “para interesarme sobre como van as obras nas estradas nacionais que pasan polo noso concello, como están os mantementos e as obras que se van facer no futuro. E sobre todo reclamei unha atención ao mantemento na parte da variante que pasa por Burela para mellorar as condicións desa estrada, sobre todo nas beiras, onde están as canalizacións e as cunetas, para favorecer que desaugue ben cando chove. E ademais vaise facer unha mellora substancial na variante á entrada ao concello de Burela”.