Mari Teijeiro reuníuse coa presidenta e co xerente do Colexio Oficial de Traballo Social de Galicia

Lugo, 22 de setembro de 2015.- A responsable de Benestar da Deputación de Lugo, Mari Teijeiro, reuniuse este martes á mañá coa presidenta do Colexio de Traballo Social, Marta Capeáns, así coma co xerente Víctor González, os que lle trasladaron diferentes propostas en materia social “unha das prioridades do noso Goberno”.

Teijeiro explica que durante a reunión a presidenta do Colexio de Traballo Social “mostrounos a súa satisfacción e entusiasmo porque a Deputación de Lugo retome a posibilidade de dar novas altas no Servizo de Teleasistencia paralizado dende o ano 2007” e, neste eido, agradece a Capeáns que lles ofrecese a colaboración do Colexio neste proceso.

Ademais, a deputada de Benestar mostrouse aberta a estudar e poder levar a cabo algunha das propostas que lle foron trasladadas polos responsables do Colexio de Traballo Social. Teijeiro indica que algunha destas ideas son a reedición da Xornada Muller e Mercado Laboral, a participación en Proxectos Europeos e a necesidade de dar formación a profesionais no eido dos servizos sociais.

Polo tanto, Mari Teijeiro comprometeuse a estudar todas as propostas e agradeceu este encontro, que serve como un primeiro paso para desenvolver unha labor coordinada e acorde coa filosofía do Traballo Social.