Olano escoita as demandas da ACISA de Ribadeo de cara a continuar avanzando na recuperación económica

Lugo, 24 de novembro de 2015.- O candidato ao Congreso dos Deputados pola provincia de Lugo para as próximas eleccións xerais de decembro, Jaime de Olano, mantivo na tarde do luns unha reunión coa directiva da Asociación de Comerciantes, Industriais, Servizos e Autónomos de Ribadeo (Acisa), na sede local da asociación.

No marco desta xuntanza, Olano interesouse polas demandas dos membros da asociación das que tomou nota de cara a darlles unhas solución o antes posible ao tempo que deu a coñecer aos cidadáns o proxecto do Partido Popular e puxo en valor as medidas de apoio adoptadas polo Goberno central e dirixidas tanto aos comerciantes como aos autónomos, de igual xeito fixo referencia ás accións vinculadas cos sectores máis representativos da localidade.

O candidato popular ao Congreso resaltou que entre as propostas de mellora que recibiu da Asociación de Comerciantes, Industriais, Servizos e Autónomos de Ribadeo atópanse a de acadar unha maior colaboración entre as administracións públicas, así como a de lograr más facilidades á hora da obtención de financiamento bancario.

Jaime de Olano defende que o Goberno de Mariano Rajoy “cumpriu e continuará a estar sempre do lado dos autónomos, dos emprendedores, dos comerciantes e industriais”, que permitiron “mellorar día a día a previsión de crecemento e de consolidación da recuperación”. Neste senso de implicación que permitiu a mellora das contratacións e a xeración de postos de traballo, o candidato popular fixo referencia a accións de goberno como a tarifa plana de 50 euros para os novos emprendedores, que beneficiou a 377.061 autónomos, ademais da bonificación do 50% na contratación de familiares colaboradores, entre moitas outras medidas. “Continuaremos ampliando os incentivos e as axudas aos autónomos e para que os emprendedores podan levar a cabo os seus proxectos”, engadiu. Neste senso, o popular explicou que ACISA tamén valorou moi positivamente o abono de facturas pendentes con medidas como o Plan de Pago a Proveedores, que evitou o peche de moitos autónomos e pequenos comercios.

O candidato popular tamén destacou os incentivos do Goberno a creación de emprego estable, co contrato indefinido de apoio aos emprendedores ou a tarifa plana de 100 euros á contratación indefinida, amais, no apoio ao comercio, Jaime de Olano puxo de relevo a creación da licenza expres para a apertura de novos establecementos e liñas ICO para dotalos de maior liquidez. Outras das medidas ás que fixo referencia o candidato durante a reunión foi á mellora das infraestruturas viarias que benefician de xeito directo o comercio e dinamizan as economías locais, permitindo converter as localidades en puntos de encontro para potenciais compradores. Neste senso, Jaime de Olano citou a construción da A-8, que mellora moi notablemente as comunicacións interiores e permite mesmo a conexión con Europa, pola fronteira francesa.

Esta reunión do candidato popular con ACISA correspóndese cun acto de precampaña, ao igual que se manterán xuntanzas con outras asociacións e entes representativos do tecido comercial e autónomo da comarca. Olano explica que “desenvolveremos unha campaña moi pegada aos cidadáns, ao pé da rúa, escoitando aos mariñáns e ao tecido asociativo que os representa”.