Ana Pontón defende unha tarifa eléctrica galega para Alcoa nun encontro co comité de empresa

Cervo/Viveiro, 28 de abril de 2016.- A portavoz nacional o BNG, Ana Pontón, mantivo un encontro co comité de empresa de Alcoa ubicada na localidade de San Cibrao en Cervo, onde trasladou a proposta nacionalista de ter unha tarifa eléctrica galega que suporía un aforro do 30% nos custes da factura da electricidade nunha factoría que ten unha elevada dependencia enerxética.

O Bloque “defende que as empresas e as familias do país se beneficien do feito de que Galiza é un país produtor e exportador neto de enerxía, polo que paga un elevado prezo en termos ambientais e territoriais, sen obter nada a cambio, ao contrario, os galegos e as galegas tamén pagan os custes do transporte da enerxía ao resto do Estado”, denunciou a dirixente nacionalista.

Neste sentido, Pontón indicou que Euskadi xa aplica unha tarifa diferenciada para as grandes empresas consumidoras de enerxía. “É unha cuestión de vontade política e de defensa dos intereses do país, algo que lle queda moi grande a Feijóo que leva sete anos gobernando de costas a Galiza e submiso as ordes de Génova e dos lobbies financeiros de Madrid”, criticou, tras asegurar que o BNG “vai seguir dando a batalla” para acadar unha tarifa eléctrica galega.

Na súa visita á Mariña, a dirixente do Bloque mantivo un encontro coas traballadoras da Conserveira Alonso do concello do Viveiro ameazada de peche, con 41 postos de traballo. Pontón avanzou que vai levar o asunto ao Parlamento para demandar do goberno da Xunta unha maior implicación para garantir a continuidade da fábrica.

“Imos levar a Cámara iniciativas para defender que non se deslocalice a produción dunha fábrica que esta localizada en Viveiro desde fai case un século, que se evite a destrución de emprego e trasladarlles a certeza de que o Bloque vai estar sempre do lado das traballadoras”, explicou Pontón, quen tamén avanzou que presentará unha declaración de apoio institucional do Parlamento a continuidade da conserveira en Celeiro.