Este mércores comezan a traballar 9 dos 23 socorristas contratados polo Concello de Ribadeo para a tempada estival

Ribadeo, 15 de xuño de 2016.- Este mércores comezan a traballar 9 dos 23 socorristas contratados polo Concello para esta campaña estival. A segunda quenda principiará o 1 de xullo. Ribadeo é o primeiro concello da Mariña en contar con este servizo en 2016.

O alcalde, Fernando Suárez, contou que este mércores, “a mediados de mes, é cando empezan traballar unha serie de socorristas que contratamos no Concello de Ribadeo, concretamente 9 dos 23 que temos previsto que durante todo este verán, e o resto a partir do 1 de xullo, estean operativos ata o 15 de setembro para cubrir esta longa tempada estival”.

O rexedor ribadense explicou que “facemos isto e somos dos primeiros en ter xa técnicos de salvamento nas nosas praias, que serán reforzados con técnicos sanitarios, e que están sendo reforzados tamén polos operarios de medio ambiente e as profesionais de turismo porque entre todas estas áreas queremos ter o noso concello moi preparado para toda esta campaña estival que promete ser histórica como todos estes últimos anos, onde cada ano se bate récord no número de visitantes”.

Fernando Suárez subliñou que “iso é moi bo para a economía de servizos que temos en Ribadeo. Non temos outra, esta é a máis importante que temos, as outras dúas a secundaria e a primaria son cativas a día de hoxe, e temos que potenciar e aproveitar o recurso que temos”.

O alcalde de Ribadeo manifestou que “sabemos que o inverno é moi longo e no verán ven moita xente. Queremos que se sinta cómoda, que merque, que durma e estea aquí en Ribadeo e todo o noso esforzo está dedicado precisamente a facelo máis agradable. Para que falen ben de nós polo mundo adiante, para que se queden con bo sabor de boca para volver e para que isto redunde na economía municipal”.

Finalmente Suárez Barcia dixo que “aventuramos que vai ser un verán tamén intenso en número de visitantes de todos os puntos. Atrévome a dicir que xa do mundo, porque Ribadeo cada vez é máis internacional. A miña compañeira de Turismo, Ana Martínez, dicía que no que levábamos de mes o 30% dos visitantes que se achegaban aquí eran estranxeiros. Parece que o 30% é pouco, pero o 30% de visitantes estranxeiros hai quince anos era unha quimera absoluta e hoxe é unha realidade”.

O alcalde e a concelleira de Sostibilidade Ambiental e Medio Mariño, Paz Ermida, mantiveron na mañá deste mércores un encontro cos socorristas no salón de plenos do Concello.