Inés Hernández e Joel Romero representan a Galicia no Campionato de España de TaiJitsu

Valencia acolle esta fin de semana o campionato de España de Tai Jitsu, modalidade deportiva de defensa persoal que pertence a Real Federación Española de Kárate, e ata alí desprazaranse a burelesa de 15 anos de idade Inés Hernández Crego en calidade de campioa de Galicia na categoría Sénior ata cinturón azul e o viveirense de 20 anos Joel Romero Parapar como subcampión de Galicia na categoría Sénior cinturón negro.

A Asociación de Artes Marciales da Mariña, á cal pertencen ambos deportistas, destaca a xuventude e a ilusión coa que parten ambos deportistas cara a cita do calendario deportivo nacional, ambos enfrentaranse a outros deportistas de máis idade e experiencia dentro do tatami, así coma a comunidades autónomas con moita máis tradición e número de licencias neste arte marcial. Cabe destacar que os dous xoves mariñanos representan o presente e o futuro desta disciplina tanto na comarca da Mariña coma en Galicia.

Polo tanto, dende a Asociación de Artes Marciales da Mariña manifestan “o orgullo que nos produce, amosarlles todo o noso apoio e destacar que a experiencia dun campionato de España representando a súa comunidade autónoma é unha oportunidade e unha vivencia única que ambos deben disfrutar e da que extraer unha lectura positiva”.