O PSOE da Pontenova lamenta que o PP critique os investimentos do Concello, que está na súa mellor situación económica

A Pontenova, 7 de setembro de 2016.- O PSOE da Pontenova lamenta que o PP critique os investimentos realizados polo Goberno socialista dende o Concello para a dotación e mellora de servizos públicos municipais aos veciños cando, por riba, a situación económica do municipio é a mellor dende hai máis dunha década, tras o traballo levado a cabo polo PSOE.

Os socialistas consideran que as críticas dos populares se deben “a súa absoluta falta de coñecemento e entendemento sobre a xestión municipal, as cuestións económicas e ata sobre a lexislación vixente”. Por este motivo, o PSOE explica ao PP que non cumprir coa regra de gasto significa investir máis do previsto, “cuestión bastante difícil de entender que se critique, cando isto supón más servizos públicos para os nosos veciños. Se isto aconteceu no 2015, foi debido á incorporación de novos fondos, captados doutras administracións, para executar grandes proxectos como, por exemplo, o novo campo de fútbol da Pontenova ou os arranxos e melloras de estradas e accesos público en zonais rurais do noso Concello”.

O PSOE sorpréndese de que, por riba, isto se critique cando o Concello da Pontenova vive a súa mellor situación económica dende hai máis dunha década.

“Cando os socialista chegamos ao Goberno local, descubrimos como o PP tiña deixado ao Concello cunha débeda financeira de 1,5 millóns de euros. Fomos o actual equipo de goberno municipal do PSOE, con Darío Campos á fronte, os que reducimos a débeda a moito máis da metade, aos 400.000 euros, sen deixar de investir nin un só euro na mellora das dotacións públicas municipais aos nosos veciños, e ata convertendo ao noso Concello nun dos da provincia que máis rápida pagan aos provedores, pois temos unha media de paga duns 25 días”.

“O PP tamén debería saber que os responsables do Catastrazo son, precisamente, eles, o Partido Popular dende o Goberno Central”, concluiron.