O BNG denuncia que A Mariña segue perdendo servizos que marchan para Lugo

A Mariña, 23 de decembro de 2016. O Bloque Nacionalista Galego na Mariña lamenta unha nova perda de servizos para as veciñas e veciños desta comarca. “Neste caso, o peche onte mesmo da Unidade de Recadación Executiva da Tesourería da Seguridade Social que, ata este momento operaba en Mondoñedo, vén a continuar co desmantelamento desta comarca a facer da centralización de servizos en Lugo”, explica Ana Ermida.

Segundo expuxo a responsábel comarcal nacionalista, “este é un novo pau para as veciñas e veciños que, ao igual que xa acontece con servizos de Facenda ou mesmo consultas médicas, terán que desprazarse a Lugo para realizar trámites que antes podían facer en Mondoñedo”.

“Todo isto responde a unha idea de administración promovida polo Partido Popular que, coa disculpa de recortar gastos, alonxa os servizos das persoas; provocándolles a estas máis molestias e gastos”, continúa.
Desde o BNG defenden a proximidade dos servizos para unha mellor prestación dos mesmos e opinan que “a tendencia debera ser a diametralmente oposta: en época de crise hai que facilitarlle á xente a realización de trámites o máis preto posible”.

Iniciativas nos concellos
Os grupos municipais do BNG promoverán en todos os concellos da comarca que as corporacións se posicionen en contra deste peche e insten ao goberno central, do que depende a Seguridade Social, a reabrir esta oficina de Mondoñedo.

O Concello de Mondoñedo tiña adquirido este compromiso despois do acordo unánime que se adoptara en agosto, pero o concelleiro e concelleiras nacionalistas descoñecen se a alcaldesa fixo o seu traballo ou o deixou aparcado, deixando marchar este servizo da súa cidade sen ningún tipo de xestión para evitalo.