Lugo, 11 de marzo de 2017.A Consellería de Infraestruturas e Vivenda ofrece máis de 100.000 metros cadrados de solo industrial cunha bonificación de ata o 50% en cinco polígonos industriais da Mariña.
O delegado territorial, José Manuel Balseiro, informou hoxe de que quedan 54 parcelas dispoñibles nos parques de Barreiros, Cuiña (Cervo), Foz, Lourenzá e Viveiro.
Balseiro afirmou que a Xunta está a apoiar ao tecido empresarial da Mariña ofrecendo solo urbanizado, dotado dos servizos necesarios e ben comunicado, nas mellores condicións do mercado, grazas á aplicación de bonificacións de ata o 50 % no prezo de venda do solo empresarial. Deste xeito, engadiu, “as empresas poden concentrar os seus investimentos iniciais na construción e dotación das instalacións”.
Esta medida de axuda posibilitou que, entre 2015 e 2016, se adxudicaran preto de 65.000 metros cadrados de solo empresarial para o desenvolvemento de proxectos en 36 parcelas dos citados polígonos mariñáns, varios dos cales experimentaron xa procesos de ampliación.
Balseiro afirmou que a Xunta “aposta polos emprendedores, empregando para elo todas as ferramentas de que dispón, entre elas a promoción de solo empresarial nas condicións máis vantaxosas posibles”.
Na mesma liña, explicou que o Goberno autonómico tamén está a ofrecer a posibilidade de adxudicación de solo empresarial en dereito de superficie. Esta opción está destinada a iniciativas que sexan declaradas proxectos empresariais singulares, que precisan unha ampla superficie para instalarse e requiren grandes investimentos.
Esta opción supón que os interesados só paguen un canon simbólico anual, coa posibilidade de adquirir o solo nos 10 primeiros anos da adxudicación, descontando do prezo o 40 % do pagado en concepto de canon, o que supón un alugueiro simbólico con dereito de compra.