Cervo, 10 de novembro.- A Xunta de Goberno Local aprobou esta mañá o expediente para a adxudicación por concurso dos 6 locais habilitados no antigo edificio das Cabalerizas, no Coxunto Histórico Artístico de Sargadelos, e que serán destinados á venda ao público de produtos artesanais. Tamén quedou aprobado o prego de cláusulas que regulará a adxudicación dos contratos de cesión en uso en réxime de arrendamento destes habitáculos.
O alcalde de Cervo, Alfonso Villares, apuntou que “demos este paso adiante en canto nos remitiron todos os informes necesarios, todos eles favorables, e incluso algún da dirección Xeral de Patrimonio que non é vinculante pero que nós consideramos importante, tendo en conta ademais que estamos a falar dun Ben de Interese Cultural (BIC)”.
Villares sinalou que os locais teñen unha superficie útil que vai dende os 47 aos 70 m2; e dous deles, os máis grandes (de 67 e 70 m2) foron concibidos para ser establecementos de venda ao público de produtos alimentarios artesanais, e os restantes catro poderán ser destinados a calquera actividade artesanal que se adecúe á normativa vixente nesta materia.
Así mesmo o alcalde puntualizou que cada local terá un canon anual medio, cumprindo a normativa, que vai dende os 1400 aos 2200 euros, en función das cartacterísticas do mesmo. Pero recordou que nos propios pregos se recolle que o Concello vai “establecer bonificacións de ata o 90%; polo que os artesáns que se instalen no Conxunto Histórico terían que facer fronte a unha taxa anual duns 200 euros de media, para desenvolver a súa actividade nun destes habitáculos; unha cantidade que consideramos que é simbólica “porque a nosa intención é echer de vida e de artesáns o Conxunto Histórico Artístico de Sargadelos”.
Villares recalcou que con este proxecto “pretendemos poñer en valor toda esta contorna, e tamén o traballo dos propios artesáns, favorecendo así mesmo a economía local a través da creación de novos cauces de comercialización de produtos artesanais galegos e da creación de emprego; co fin de que o Centro de Artesanía sexa un novo espazo de intercambio de experiencias e coñecementos artesanais, servindo ademais como sé de actividades socioculturais que permitan proxectar a imaxe pública do Conxunto Histórico, e contribúan a que esta zona sexa un punto de visita obrigada nas épocas de ocio e estivais, pero tamén durante todo o ano”.
Dende o Concello de Cervo –engadiu Villares-, pretendemos darlle a máxima difusión posible ao futuro Centro de Artesanía, por unha banda tendo en conta que o pregos xa teñen que ser públicos, pero por outra faremos chegar a proposta a todas as asociacións de artesáns de Galicia e persoas relacionadas coa actividade “porque entendemos que o Centro de Artesanía de Sargadelos vai ter o seu peso e proxección e estamos convencidos de que funcionará porque conflúen moitos factores: o bo facer dos artesáns, nun enclave excepcional, cuns locais perfectamente acondicionados para que podan adaptalos á súa actividade concreta; é unha combinación ideal que contribuirá en gran medida ao desenvolvemento económico, turístico, cultural e patrimonial do Concello de Cervo”.
Villares recordou que a obra contou con orzamento de 120.000 euros, procedentes da Xunta de Galicia e do propio Concello, “destinados integramente á posta en marcha dun centro vivo que agardamos, entre todos, convertir en referente na Comarca”.
A xunta de goberno local de Cervo vén de aprobar os pregos que regularán o concurso para a adxudicación dos 6 locais do centro de artesanía de Sargadelos
Relacionado
A iniciativa xurdiu co obxectivo de xuntar o alumnado que coincidira na EGB, pero axiña se ampliou a todas aquelas persoas que compartiron pupitres e amizades tamén no instituto.
O público, totalmente entregado de principio a fin, amosouno cos intensos e prolongados aplausos que acompañaron toda a actuación. Ao remate, os asistentes expresaron o seu desexo de poder gozar no futuro de novos concertos do artista, que sen dúbida volverán entusiasmar ao público.
Villares subliñou o éxito de convocatoria do evento, que reúne cada ano a numerosos participantes e afeccionados en Ribadeo, “aproveitando o atractivo da ría e do seu porto deportivo para atraer visitantes e complementar co deporte a súa ampla oferta de natureza, patrimonio e gastronomía”. A presente edición estivo dedicada á figura de Leopoldo Calvo-Sotelo, con motivo do centenario do nacemento do que fora presidente do Goberno e alcalde honorario do municipio. Ademais das regatas de vela en distintas categorías, celebráronse bautizos de buceo, charlas ou un concurso de pesca, entre outras actividades.
Na xuntanza preténdese analizar a execución das obras, o comportamento da empresa responsable, a problemática dos accesos durante as Festas de Xunqueira e solicitar ao Concello de Viveiro que faga público o proxecto definitivo.
A marcha partirá ás 12:30 horas diante do Concello, percorrerá as rúas peonís do centro e rematará novamente na casa consistorial, onde se lerá un manifesto. A plataforma chama a mobilizarse cunha mensaxe clara: cada bomba destrúe vidas e cada silencio convértenos en cómplices. Defenden que é o momento de saír á rúa para esixir o fin da violencia, o respecto aos dereitos humanos e a liberdade do pobo palestino, lembrando que a presenza das persoas manifestantes é a voz de quen hoxe non pode falar. A convocatoria péchase cun triplo chamamento: non á guerra, non ao silencio e non á indiferenza.
Estiveron acompañados polas dúas técnicas de Xuventude, para gozar dunha mañá nas distintas actividades que ofrece este parque de trampolíns. Pola tarde, o grupo parou a xantar no Lago das Pontes, onde puido coñecer a historia da súa creación e desfrutar dun baño. A viaxe estivo organizada polas Concellerías de Xuventude e Deporte e pola Oficina de Información Xuvenil dentro do programa “Verán a Tope en Xove 2026”.
Evaristo Calvo, Rebeca Montero e Vítor Mosqueira interpretaron o pasaxe que recrea os últimos momentos do Mariscal Pardo de Cela e da súa muller, Isabel de Castro, antes da traizón da Frouseira. A acción cultural, coordinada por Carme Varela e promovida pola Vicepresidencia da Deputación de Lugo, rende homenaxe ao gran dramaturgo do Valadouro no seu primeiro cabodano. 
