Ribadeo, 20 de novembro de 2018.- O delegado territorial da Xunta en Lugo, José Manuel Balseiro, mantivo esta mañá un encontro cos participantes nos dous obradoiros de emprego que se desenvolven en Ribadeo. Neste concello están en marcha o obradoiro Ribadeo co Camiño, que forma a 20 persoas desempregadas ao tempo que realiza actividades de mellora e dinamización en torno á ruta xacobea, ademais do taller Doc-Tic II, que achega formación a 16 mozos e mozas menores de 30 anos.
Segundo explicou Balseiro, ambas iniciativas suman 43 contratacións, entre alumnos traballadores e persoal de dirección, administración e monitores. Os proxectos son promovidos polo Concello de Ribadeo e financiados pola Consellería de Economía, Emprego e Industria cun investimento conxunto de 443.000 euros.
O primeiro dos obradoiros ten unha duración de nove meses -ata finais de xullo do 2019- e imparte as especialidades de ‘Instalación e mantemento de xardíns e zonas verdes’ e ‘Dinamización, programación e desenvolvemento de accións culturais’, con dez participantes cada unha delas.
Entre as actuacións previstas figuran a creación de áreas recreativas en Vilela e no contorno do albergue municipal de Ribadeo, e o acondicionamento das de Palmeira (en Ove) e a da capela do Carme de Vilela. Tamén se levarán a cabo tarefas de mantemento e limpeza de fontes situadas nas inmediacións da ruta xacobea.
O proxecto inclúe a elaboración de programación cultural para poñer en valor o patrimonio vinculado ao Camiño de Santiago, así como a creación dun espazo público virtual de divulgación sobre o tramo que percorre o concello e das iniciativas que desenvolve o propio obradoiro.
Pola súa banda, o taller DoC-TiC II dá continuidade ao labor de dixitalización do fondo documental do concello no que xa traballaron os obradoiros desenvolvidos no municipio nos últimos anos. Nesta ocasión, a iniciativa imparte as especialidades de ‘Produción fotográfica’ e ‘Operacións auxiliares de servizos administrativos e xerais’. O obradoiro estenderase ata finais do mes de marzo do vindeiro ano.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
