Burela, 16 de setembro de 2019. Do 27 ao 29 de setembro terá lugar en Burela o V Torneo Marosa Cup de fútbol, que reunirá a 50 equipos e a unhas 700 persoas. O concelleiro de Deportes, Ramiro Fernández Rey, destacou o impacto económico que terá na vila este torneo. Haberá, como novidade, fútbol feminino e ademais torneo de veteranos e da liga Genuine. Na presentación celebrada esta maña no Concello, estiveron o alcalde, Alfredo Llano, o concelleiro de Deportes, Ramiro Fernández Rey, e o presidente da SD Burela, Jesús Manuel Ares.
O edil de Deportes dixo que “vimos de facer hoxe a presentación do que vai ser a quinta edición do torneo Marosa Cup, fixémolo o alcalde e mais eu e contamos coa presencia do presidente da Sociedade Deportiva Burela, Jesús Manuel Ares. É un torneo que ano a ano vai medrando”.
Ramiro Fernández salientou que “este ano imos superar a participación que houbo en anos anteriores. Estamos falando de que en torno a cincuenta equipos van participar, o que vai supoñer que en torno a 700 xogadores veñan disputar este torneo a Burela”.
O concelleiro burelés explicou que “o torneo vai ser de iniciación, prebenxamíns, benxamíns e alevíns. Ademais este ano temos varias novidades. Unha delas é que vai haber fútbol feminino, unha aposta que fixo a Sociedade Deportiva Burela e que desde o Concello estamos apoiando e que animamos a que así fora. Tamén imos ter un torneo da Liga Genuine, que son equipos con xente con discapacidade que representan aos equipos das máximas categorías do fútbol nacional, neste caso vai participar o Lugo, que ten integrantes de aquí de Burela, o Celta máis o Deportivo. Ademais como novidade tamén teremos un torneo de veteranos, que xa se fixera o ano pasado, este ano repítese, e vai ter un participante a maiores que é o Celta de Vigo, co cal o nivel deste torneo vai ser importante xa que vai estar o Celta, o Lugo máis o Deportivo, ademais da Sociedade Deportiva Burela de Veteranos”.
Fernández Rey engadiu que “isto vai ter unha repercusión económica moi importante no pobo. Estamos falando de que moitísima xente se vai desprazar a Burela a fin de semana do 27, 28 e 29 de setembro. Tanto o Concello como a Deputación de Lugo, a través do Plan Único, imos intentar colaborar no máximo posible para que este torneo saia da mellor maneira posible, tanto economicamente como en medios materiais. Neste caso queremos felicitar, unha vez máis, á Sociedade Deportiva Burela, que está consagrando este torneo como un dos grandes referentes dos torneos de fútbol que se fan en toda a provincia de Lugo, e incluso en Galicia. Esperemos que todo saia ben e animar á xente a asistir aos partidos que estou segurísimo que vai haber un grandísimo nivel e vano pasar ben vendo o fútbol”.
O V Torneo Marosa Cup de fútbol celebrarase do 27 ao 29 de setembro en Burela. O evento deportivo reunirá a 50 equipos con arredor de 700 participantes
Relacionado
Estará dedicada á figura de Leopoldo Calvo-Sotelo, xa que neste 2026 cúmprese o centenario do nacemento de quen fora presidente do Goberno. No acto interviñeron o presidente do RCNR, Pablo Fernández, o director territorial de Deportes da Xunta, Manuel Otero, un dos fillos do tamén alcalde honorario de Ribadeo Víctor Calvo-Sotelo, e o rexedor ribadense, Dani Vega. Todos exaltaron a práctica deportiva na ría, a labor desenvolvida polo Real Club Náutico e a vinculación de Leopoldo Calvo-Sotelo co estuario. Entre o público asistente estaban máis membros da familia Calvo-Sotelo, directivos e ex directivos do RCNR, edís de Ribadeo e representantes de Acisa.
O grupo, composto por cinco mulleres e sete homes cunha media de 26 anos, foi recibido pola subdelegada do Goberno, Olimpia López, que lles agradeceu o compromiso co servizo público e destacou o papel esencial da Policía Nacional na seguridade cidadá. Oito axentes estarán na Comisaría de Lugo, dous en Monforte e dous en Viveiro. Ao finalizar as prácticas, escollerán destino definitivo segundo a puntuación obtida no proceso selectivo.
A iniciativa busca poñer en valor a diversidade cultural do municipio a través da gastronomía, convidando ás persoas de diferentes países a elaborar pratos típicos que se ofrecerán de forma gratuíta ao público. O Concello asumirá o custo dos ingredientes e asignará a cada participante un posto identificado co seu país de orixe. As inscricións poden realizarse ata o 29 de xullo enviando un correo a feiras@vilalba.es. Rouco chamou á participación para seguir construíndo unha Vilalba aberta e integradora, nunha feira que quere consolidarse como espazo de convivencia e dinamización da feira tradicional.
Ata o 4 de agosto poderán realizarse as renovacións, mantendo as tarifas aprobadas en asemblea: 200 € e 250 € para adultos, e acceso gratuíto para menores grazas ao convenio coa Fundación Imdecum, con opción voluntaria de abono infantil por 40 € con reserva de asento. A partir do 5 de agosto activaranse as novas altas. Os abonos poderán tramitarse a través de CLUBER ou presencialmente na oficina do club, con horario de mañá e tarde en xullo e só de mañá en agosto.
A Presidenta Carmela López destacou o valor deste produto emblemático da Mariña e o traballo do sector pesqueiro. Rocío Rivera e Herminia Pernas puxeron en valor a tradición mariñeira de Burela e o papel dos mariñeiros da Moncloa. O público degustou 450 tapas elaboradas con bonito nunha xornada que serviu de escaparate desta cita gastronómica e de convite a visitar Burela a próxima fin de semana.
As crianzas desfrutaron dunha refrescante xornada con inchables e xogos acuáticos na contorna do complexo deportivo da Veiga.
Trátase dunha mostra de 28 fotografías de gran formato do naturalista Ezequiel Martínez que reivindica a diversidade e a conservación da fauna salvaxe. A iniciativa, organizada polo Concello da Pastoriza en colaboración con ABANCA e Afundación dentro do proxecto Corrente cultural, poderá visitarse de balde ata o 26 de agosto. As imaxes, acompañadas de textos divulgativos elaborados por especialistas de Naturnova, amosan especies emblemáticas como o oso pardo, a cegoña, o cervo ou a aguia imperial, convidando a reflexionar sobre a importancia de protexer o patrimonio natural.
