Elena Candia: “Animo aos lucenses a votar o domingo para que gañe Galicia, para que gañemos todos”

 Lugo, 10 de xullo, 2020. A cabeza de lista do PP por Lugo, Elena Candia, desenvolveu unha intensa actividade na última xornada da campaña electoral; no peche, fixo un chamamento á participación, a acudir a votar con total liberdade e sabendo que é plenamente seguro. Candia sinala que foi unha campaña “marcada por unha prioridade, a saúde, e, segundo lugar para falar do que lle preocupa á xente, a cada sector, a cada asociación….”. “Foi realmente especial, na que incluso participei en numerosas reunións de modo telemático. Foi unha campaña en positivo, explicando o que se fixo e dando a coñecer o que queremos facer”, apunta.

Tal é así que, ademais da participación do candidato Alberto Núñez Feijóo en actos comarcais e en mítines en Monforte, Chantada, Sarria e Lugo; do presidente nacional e do secretario xeral do PP, Pablo Casado e Teodoro García Egea, respectivamente; e do ex presidente do Goberno, Mariano Rajoy, dende o PP de Lugo desenvolvéronse uns 120 actos, entre os que se atopan repartos na rúa, encontros e reunións de traballo con representantes do tecido empresarial, asociativo, económico e social da provincia -Leite Río, Vrio Pack, Maquinaria Durán, Club Fluvial, portos de Celeiro e Burela, criadores de porco celta, queixerías, comunidades de veciños e asociacións de comerciantes, entre outros- para dar a coñecer o programa co que o PPdeG concorre a estes comicios, xa que “o valor dun programa electoral non se mide polas súas palabras, senón polos seus feitos”, matiza a popular. E para elo tamén se contou coa presenza doutros candidatos por outras provincias e de membros do Goberno galego con importantes responsabilidades na Xunta de Galicia como foron o número 2 da candidatura, Francisco Conde; o voceiro do PP no Parlamento, Pedro Puy; os conselleiros de Infraestruturas, Mar, Medio Ambiente, Medio Rural, Facenda e Educación, Ethel Vázquez, Rosa Quintana, Ánxeles Vázquez, José González, Valeriano Martínez e Carmen Pomar, respectivamente; así como do vicepresidente autonómico, Alfonso Rueda, do secretario xeral de Emigración, Antonio Rodríguez Miranda; ou do secretario Xeral do PPdeG, Miguel Tellado.

O programa electoral do PPdeG está articulado en cinco eixes e que ten un dobre horizonte temporal: por unha banda, afrontar a pandemia e paliar as súas consecuencias económicas e sociais; e, por outra, deseñar a Galicia de 2030. Deste xeito, o obxectivo é que a comunidade, ademais de seguir reforzando o estado de benestar, recupere a senda do crecemento e se manteña firme no seu autogoberno e no seu galeguismo reformista.

O primeiro dos eixes pretende superar a pandemia e volver impulsar a economía con iniciativas como o Plan de reactivación económica. O segundo está encamiñado a facer de Galicia unha comunidade innovadora. Así, apóstase polas políticas en I+D+i; nunha Educación con máis plurilingüismo e máis inclusiva; e na adaptación dos sectores económicos tradicionais á sociedade dixital. O PPdeG tamén traballará por unha Galicia que sexa cada vez máis familiar e que avance cara o futuro con máis benestar. O reforzo da Sanidade Pública, o apoio ás persoas maiores e aos máis pequenos ou encarar o reto demográfico son algúns dos pilares deste terceiro eixo do programa electoral.

Por outra banda, avógase porque a Galicia de 2030 sexa máis verde, sustentable e ordenada: con menos emisións, cunha planificación forestal avanzada, cunha mellor xestión dos residuos e co remate do proceso de ordenación do territorio. O últimos dos eixos é a mellora das estruturas de gobernanza democrática de Galicia. Para iso, garántese a defensa da Constitución española e do Estatuto de Autonomía; lealdade co resto de administracións, sen deixar de defender o que lle corresponde a Galicia; o apoio dos galegos residentes no exterior; a aposta pola lingua, cultura e patrimonio; e o compromiso co Xacobeo 2021.

SEGURIDADE
Cun programa que se comezará a desenvolver dende o día 13, a candidata anima así aos lucenses a votar porque, ademais, todo está protocolizado e supervisado polos técnicos. “Animo a que o fagamos con total liberdade para que gañe Galicia, para que gañemos todos”. “Só hai dúas opcións. Por un lado, Alberto Núñez Feijóo, que representa a experiencia, a coherencia, a fiabilidade, as medidas previsibles e a responsabilidade; e, polo outro lado, un multipartito con intereses contrapostos, inexperiencia total na xestión e unha imposibilidade absoluta de saber que queren facer de Galicia”, sentencia.

PECHE DE CAMPAÑA CANDIDATOS
A cabeza de lista, Elena Candia, mantivo esta maña sendos encontros telemáticos. O primeiro con representantes do Porto de Celeiro e da Confraría de Pescadores, xunto ao tamén candidato José Manuel Balseiro, e no que tamén interveu Rosa Quintana. A continuación, Candia fixo o mesmo coas entidades de carácter social da cidade de Lugo APSNAIS, Cáritas Lugo, ALIAD Ultreia, Down Lugo e Asociación Española contra o Cancro de Lugo.

Cristina Sanz, Ramón Carballo, Encarna Amigo e Javier Vázquez Prado, acompañaron a Alberto Núñez Feijóo na visita que este fixo esta tarde á cidade. O número 2, Francisco Conde, pechou a campaña na súa vila natal, en Monforte de Lemos, acompañado da tamén candidata e voceira do Grupo Municipal do PP nesta localidade, Katy Varela.

Conde subliñou o compromiso do PPdeG con Galicia, con Lugo e coa cidade do Cabe, avalado pola experiencia, pola confianza e pola capacidade de xestión demostradas durante os gobernos de Alberto Núñez Feijóo. O candidato popular asegurou aos asistentes que o domingo disporán de todas as condicións sanitarias necesarias para desprazarse con seguridade aos colexios electorais, e animou a acudir ás urnas para permitir que a actual Xunta siga traballando cos autónomos, pemes e emprendedores de cara á reactivación económica e á recuperación do emprego de calidade en toda Galicia. Neste senso, o número 2 por Lugo antepuxo a experiencia demostrada polo PPdeG fronte ás alternativas que arroxa o multipartito, asegurando que as posibilidades de coalición téñense probado “ineficaces e caóticas” co Goberno de coalición en Madrid. Un Goberno, asegurou Conde, “cómplice cos desprezos a Galicia”, especialmente nos ámbitos industrial e laboral.

Susana López Abella e Raquel Arias clausuraron o período electoral na Zona Sur cun encontro sobre igualdade con representantes de dúas das asociacións sociais máis destacadas de Chantada. É o caso da asociación de familiares de enfermos de Alzheirmer AFA Chantada, que preside Enrique Rojo, e da asociación de persoas con discapacidade intelectural maiores de 18 anos, ASDEME.

En ambos os dous casos, recolleron as propostas dos colectivos que están a facer, sinalan, “un gran traballo na inclusión social”, e trasladaron as liñas programáticas do PPdeG nesta materia e que se levarán a cabo se este domingo Núñez Feijóo revalida a presidencia da Xunta. As populares asumiron así o compromiso de colaborar con estas entidades na medida en que isto sexa posible, ao tempo que coñeceron de primeira man o labor que realizan. No caso de ASDEME púxose en valor a prestación que ofrecen, con 25 prazas e manifestaron a súa satisfacción por non presentar ningún caso de coronavirus. Xa, a última hora da tarde, Abella, xunto aos compañeiros de lista Cristina Sanz, Encarna Amigo e Javier Vázquez Prado, mantivo en Lugo unha xuntanza con membros de Novas Xeracións da provincia; colectivo que preside a senadora Rosa Arza. O simposio, onde se abordou as políticas de igualdade e o proxecto político que lidera Núñez Feijóo para a mocidade, tamén contou coa participación do vicevoceiro do PP no Concello da capital, Antonio Ameijide.