Unha avaría de Begasa provoca deficiencias no alumeado da Veiga

CERVO .- Unha avaría na rede xeral de subministro eléctrico da empresa Begasa provocou nos últimos días deficiencias no alumeado público do barrio da Veiga, en San Ciprián. Así o confirmou onte o propio alcalde, Alfonso Villares, quen sinalou que ao longo destes días varios veciños se dirixiron a el en persoa e a través da web municipal para poñer en coñecemento do goberno municipal as citadas deficiencias que afectaban á iluminación de varías rúas desta zona.

Segundo o alcalde, no momento de coñecer estas eivas técnicos municipais se desprazaron á zona para tentar solucionar o problema, “e comprobaron que non era unha avaría do tendido que subministra electricidade aos puntos de luz municipais; se non que era debido a unha avaría na rede xeral” indicou Villares. Unha vez comprobado isto, dende o Concello puxéronse en contacto con Begasa, e no día de onte técnicos desta empresa procederon a arranxar o problema.

“Ao parecer tratábase dun curtocircuíto nunha das fases da rede xeral que subministra electricidade aos farois desa zona. Segundo os técnicos, o apagón viña provocado dende unha das vivendas dos arredores e os arranxos dilatáronse máis do desexable pola tardanza en atopar aos seus propietarios para que os técnicos de Begasa puideran acceder a ela e solucionar o problema” indicou Villares.