A Consellería de Medio Rural organiza “catas de viños e augardentes de Galicia 2011”

Nota de prensa:
AS ‘CATAS DE VIÑOS E AUGARDENTES DE GALICIA 2011’ RECOÑECERÁN AOS MELLORES PRODUTOS VITIVINÍCOLAS DE GALICIA

O certame, organizado pola Consellería do Medio Rural, supón un importante incentivo para os caldos galegos e a súa proxección e promoción comercial
Recoñeceranse os mellores viños, seleccionados entre un total de 185, e as augardentes galegas, elixidas entre as 16 concorrentes
Ao acto acudirán o presidente da Xunta de Galicia, Alberto Núñez Feijóo, e o conselleiro do Medio Rural, Samuel Juárez

Santiago, 4 de setembro de 2011.- O vindeiro xoves celebrarase a entrega de premios da XXIII Cata de Viños de Galicia 2011, certame organizado pola Consellería do Medio Rural en colaboración cos consellos reguladores participantes. Este é un dos máis importantes certames dos que se celebran en Galicia e que conta coa categoría de concurso oficialmente recoñecido de viños de España.

O lugar escollido para a cerimonia foi o Mosteiro de San Clodio, no concello ourensán de Leiro, un cenobio medieval declarado Monumento Histórico Nacional no ano 1931. O acto contará coa presenza do presidente da Xunta de Galicia, Alberto Núñez Feijóo, que estará acompañado polo Conselleiro do Medio Rural, Samuel Juárez.

Viños e augardentes premiados

Nas catas celebradas durante o mes de xullo participaron un total de doce expertos do mundo do viño, encargados de examinar as características e calidades dun total de 185 caldos procedentes de 105 adegas das Denominacións de Orixe Ribeiro, Valdeorras, Ribeira Sacra, Rías Baixas e Monterrei. Os viños concorrentes nas catas foron elaborados nas adegas inscritas a estas Denominacións de Orixe, con uvas da colleita do ano 2010 ou do 2009, no caso de que nalgunha das súas fases de elaboración estivesen en contacto con madeira. Os caldos inscritos no concurso competiron para obter recoñecementos como o de Mellor Branco e Mellor Tinto de Galicia (elixidos entre os caldos mellor puntuados en cada denominación de orixe). Tamén se outorgarán os Acios de Ouro, Prata e Bronce para os tres viños mellor puntuados na categoría de Viños de Colleiteiro.

No mesmo acto, farase entrega dos galardóns correspondentes á XIII Edición da Cata de Augardentes de Galicia 2011, na que colabora o Consello Regulador das Denominacións Xeográficas das Augardentes e Licores de Galicia. No certame participaron 16 augardentes, das cales sairán premiadas tres, cos recoñecementos Pote de Ouro, de Prata e de Bronce.

Calidade recoñecida

Este tipo de certames, como o organizado polo departamento que dirixe Samuel Juárez, destacan pola súa importancia para dar a coñecer os viños galegos, posuidores de personalidade e características propias. As condicións axeitadas do territorio galego para o cultivo de vide, xunto co traballo e iniciativa de adegueiros e colleiteiros fan dos caldos galegos, un produto de calidade, de recoñecido prestixio dentro e fóra da Comunidade Autónoma e moi valorado nos mercados á hora da súa comercialización.