Concentracións de empregados públicos contra o anteproxecto de Lei de Medidas no Emprego Público

Nota de prensa

Hoxe as once e media da maña producíronse concentracións de empregados públicos diante do Hospital da Costa, unhas 200 persoas, e diante da Resicencia de Terceira Idade de Burela que contou co apoio de unhas 50 , o motivo era o de manifestar o rexeitamento ó Anteproxecto de Lei de Medidas no Emprego Público,que se estaba a aprobar neste mesmo día no Consello de Goberno da Xunta de Galicia, e que supón, coa escusa da crise e o aforro, un atentado ó Emprego Público e por ende unha agresión en toda regla aos empregados/as do sector público autonómico concretado en medidas tales como:

A suspensión do fondo da Acción Social, medida que ven a agravar a situación dos empregados do sector público con menor nivel retributivo, cabe que sinalar que non poucos deles non son nin mileuristas.
A precarización do traballo do persoal eventual e interino (ataque sen precedentes), o que se poderá reducir até un tercio a súa xornada e salario, o que sen dúbida suporá ben un deterioro na calidade das prestacións, ben un incremento das asistencias técnicas ou a esternalización dos servizos.
O recorte inaceptable e unilateral do V Convenio Colectivo Único para o Persoal Laboral da Xunta de Galicia co que se pretende suspender as compensacións acordadas por domingos e festivos traballados, medida que non axuda precisamente o descenso do desemprego, máis o contrario.

Do mesmo xeito que outros recortes de dereitos consolidados e adquiridos mediante a negociación colectiva: complemento do 100% en caso de IT, rebaixa nos días de asuntos persoais, etc. Como compensación a estas regresivas medidas proponse a suspensión “temporal” do complemento de ex altos cargos, antiga reivindicación retirando o termo “temporal”.

Polo que e diante de todas estas medidas, as organización sindicais maioritarias, acordan en distintas e multitudinarias asembleas, realizadas o longo das pasadas semanas nos centros de traballo máis representativos:

1º Pedir a retirada inmediata do Anteproxecto.

2º O establecemento de un calendario continuo e variado de mobilizacións.

3º A presentación de unha alternativa ao Anteproxecto onde se mostra o que a xuízo destas organización, si suporía un aforro real, sen que o peso do mesmo recaía de novo no denostado colectivo de Empregados Públicos.

MANIFESTO SINDICAL CONTRA O ANTEPROXECTO DE LEI DE MEDIDAS NO EMPREGO PÚBLICO DA XUNTA DE GALICIA.

Os Servizos Públicos son os principais instrumentos que determinan o desenvolvemento e a calidade do Estado do benestar. Deles dependen a gratuidade, a calidade e a universalidade da educación, da sanidade e uns servizos sociais que atendan as persoas e desenvolvan a lei de dependencia. Satisfán as necesidades máis básicas da cidadanía en condicións de acceso universal, non discriminatorio e cun custo accesible, vertebran a sociedade e garanten a igualdade das persoas, asegurando unha maior cohesión social.

Todas as medidas propostas, neste anteproxecto de Lei, supoñen un ataque brutal e inxustificado, dirixido, unha vez máis, ao conxunto dos empregados e empregadas públicos, medidas que, de aplicarse, condicionarán, aínda máis, o futuro dos Servizos Públicos en Galicia; en consecuencia, debemos rexeitar e rexeitamos todas e cada unha das medidas propostas en base ao seguinte decálogo.

Primeira:

As medidas recollidas no Anteproxecto de Lei de Medidas no Emprego Público supoñen un severo retroceso nos dereitos laborais e sociais dos traballadores e traballadoras do sector público, dependente da Xunta de Galiza. Trátase dun anteproxecto lesivo para o Sector Público, para os empregados e empregadas públicos/as e para a cidadanía, pois supón unha degradación da imaxe pública dos traballadores/as, unha desvalorización da Administración Pública, unha mingua na calidade dos servizos prestados á cidadanía e a destrución de emprego.

Segunda:

O goberno da Xunta fai recaer, unha vez máis, o custo da crise sobre os empregados e as empregadas públicos/as: os traballadores e traballadoras públicos/as sufriron unha diminución do salario real medio de máis do 13% nos últimos tres anos, a taxa de reposición aplicada na administración foi moi baixa, reduciuse emprego público pola vía das interinidades/substitucións e retrocedeuse severamente en dereitos sociais.

Terceira:

As medidas presentadas supoñen un novo erro nas políticas adoptadas para saír da crise e só terán efectos negativos tanto sobre o conxunto da actividade económica, retraendo o consumo e o poder adquisitivo dunha parte da poboación, como sobre os servizos públicos reducindo o persoal e, polo tanto, a calidade dos servizos que se prestan. Consideramos as medidas propostas como un acto demagóxico para xustificar a política de recortes nos servizos públicos, practicada por este goberno, mentres que o gasto público e o malgasto se dispara en asesores políticos, asistencias técnicas e gastos suntuarios, sen que este goberno adopte medidas correctoras. Non se toman medidas contra a fraude fiscal nin se aplica unha política fiscal progresiva que grave máis as rendas de capital e que pague máis o que máis ten.

Cuarta:

Porque non se xustifican máis medidas de axuste. Desde hai tres anos, o Goberno galego reincide no recorte do gasto público como única vía de reducir o déficit público, sen que isto se traduza nunha recuperación da actividade económica. Non se pode seguir incidindo nas políticas de recorte de gastos. Galicia ten marxe e competencias para actuar en materia fiscal e obter máis ingresos para diminuír o déficit e non continuar desmantelando o Sector Público e recortando os dereitos laborais e salariais dos seus empregados e empregadas.

Quinta:

As medidas son discrecionais quedando, en moitos casos, ó arbitrio da Administración e provocan desigualdades entre os diferentes colectivos. Consideramos intolerábel que quen enferme pague, pois iso significa a detracción de parte das súas retribucións nesta circunstancia, para pagar a mala xestión e a dilapidación deste goberno.

Sexta:

Non todas as actuacións propostas supoñen a suspensión temporal de normas ou preceptos, o que implica que, unha vez máis, se aproveita a escusa da crise para adoptar medidas de cambios estruturais no emprego público baixo a aparencia de medidas conxunturais. Consideramos discriminatorio que o persoal temporal ou interino poida ver reducida nun terzo a súa xornada e retribucións, mentres o seu traballo pode ser feito por empresas privadas.

Sétima:

Unha boa parte das actuacións teñen como finalidade a redución do emprego público, a ampliación da xornada ou a aposta pola xubilación do persoal que traerá consigo a amortización de postos de traballo.

Oitava:

Vulnera o dereito á negociación colectiva na Administración Galega e no sector público autonómico, derrogando convenios e modificando unilateralmente o V Convenio Colectivo único para o persoal laboral da Xunta de Galicia.

Novena:

Reduce o salario dos empregados e empregadas públicos/as, xa que recorta prestacións sociais que son salario diferido.

Décima:

Estas medidas non garanten que non poidan vir novos recortes dos PGE.

Por todo isto, ESIXIMOS a inmediata retirada deste anteproxecto de Lei de medidas no emprego público.