Economía e Industria xestionou unha liña financeira de 10 millóns de euros, avalada polo Igape, para as PEMEs

Re-Export facilita o financiamento de operacións de exportación por 10 millóns

ECONOMÍA E INDUSTRIA ASINA UN PROGRAMA PIONEIRO CON 10 ENTIDADES FINANCEIRAS QUE ABRE A LIÑA DE AVAIS RE-EXPORT PARA FINANCIAR OS CUSTOS DE EXPORTACIÓNS DAS PEMES

 Javier Guerra salienta a necesidade de manter a máxima colaboración coas entidades de crédito para favorecer a actividade comercial das pemes galegas

 Esta iniciativa facilitará o cobro anticipado dos importes das exportacións contratadas e materializadas

Santiago, 25 de maio de 2012.- O conselleiro de Economía e Industria, Javier Guerra, asinou hoxe un acordo pioneiro con 10 entidades financeiras para por en marcha unha nova liña financeira de 10 millóns de euros, avalada polo Igape, para financiar os custos das operacións de exportación das pequenas e medianas empresas galegas.

Javier Guerra salientou hoxe a necesidade de manter a máxima colaboración coas entidades de crédito para favorecer a actividade comercial das pemes galegas e desatacou o compromiso das entidades asinantes, ademais de deixar a porta aberta á participación das entidades que queiran participar neste programa. Neste sentido, salientou a presenza de das 10 entidades participantes: Banco Gallego, NCG Banco, Banco Etcheverría, Banco Popular Español, Banco Pastor, Caixabank, Banco Espirito Santo, Caixa Rural Galega, Bankinter e Banco Sabadell.

Guerra lembrou que co Re-Export a Xunta está a pór en marcha unha nova liña de avais do 50% para facilitar o financiamento das operacións de exportación das pemes galegas por importe de 10 millóns de euros, que vén a completar as distintas ferramentas postas ao dispor das empresas galegas pola Consellería que dirixe.

O acordo asinado hoxe esta destinado a impulsar as exportacións das pemes de calquera actividade produtiva, facilitando o acceso ao financiamento operativo, tanto para iniciar como para ampliar e consolidar a actividade exportadora. As operacións avaladas polo programa re-Export oscilarán entre os 80.000 e os 250.000 euros.

Os avais concedidos polo Igape, ao abeiro do novo programa, poderán garantir operacións de financiamento de materias primas para a fabricación dos produtos a exportar e de gastos derivados dos procesos de envasado e preparación para o envío ao exterior. Do mesmo xeito as axudas facilitarán o cobro anticipado dos importes das exportacións contratadas e materializadas.

Guerra sinalou que esta iniciativa enmárcase no eixo de apoio á internacionalización da empresa galega ao que a Consellería de Economía xa ten destinado 76 millóns de euros, no que vai de lexislatura. Neste eido, a Consellería traballa para continuar incrementando o número de empresas galegas presentes nos mercados internacionais, xa que o obxectivo fixado pola Xunta para 2013 era acadar un aumento de 700 novas empresas exportadoras e tense chegado ás 500, contando cun total de 5.373 empresas galegas exportadoras.