PORTA NORTE E IMDECUM ESTREAN O CAMPUS DE XIMNASIA RÍTMICA CUNHA TRINTENA DE PARTICIPANTES
Luns 16 de xullo. A escola de ximnasia rítmica Porta Norte estreou hoxe en Burela o seu primeiro campus estival cunha trintena de participantes entre prebenxamín e cadete. A iniciativa conta coa colaboración da Fundación Imdecum.
Ao longo da semana e ata o sábado, as pequenas, procedentes de Viveiro, Foz, Ribadeo, Xove e da propia vila burelá, divertiranse e aprenderán no pavillón Monte Castelo non só ximnasia rítmica senón tamén ballet, baile moderno, expresión corporal, maquillaxe, elaboración de vestimenta para bailes, técnica corporal e de aparellos… Pero tamén terán tempo para manualidades, excursións ou o amigo invisible. Xunto ás adestradoras de Porta Norte, Nelly Bouso e Cristina Iglesias, formará parte do profesorado Estefanía Pérez, ensinante de danza española da academia asturiana de Navia Las Zapatillas Rojas.
O campus desenvolverase en horario matutino, entre ás 10.00-14.00 horas, excepto o martes e o xoves, que se prolongará ata as 19.30 horas. O pavillón Vista Alegre acollerá o festival de clausura o sábado, ás 12.30 horas.