TERESA GONZÁLEZ AGRADECE AS INICIATIVAS QUE COLECTIVOS, ASOCIACIÓNS E PARTICULARES FIXERON DURANTE TODO O ANO PARA AXUDAR ÁS FAMILIAS MÁIS NECESITADAS DO CONCELLO.
Ribadeo, 28 de decembro de 2012. A Concellaría de Servizos Sociais canalizou ao longo do ano as axudas que colectivos, asociacións e particulares anónimos quixeron aportar para as familias máis necesitadas do concello. En total na actualidade son máis de 100 as unidades familiares que reciben este apoio en Ribadeo.
Teresa González Piñeiroa agradece as iniciativas levadas adiante e a colaboración de todos eles “para cubrir as necesidades básicas de moitos veciños e veciñas de Ribadeo”. A concelleira de Servizos Sociais tivo palabras de recoñecemento “para os bombeiros do parque comarcal de Barreiros polo traballo que realizaron. Eles doáronnos pescadas e alimentos, que distribuímos para a cea de noiteboa. Temos tamén en Ribadeo unha firma de agricultura ecolóxica que nos da alimentos todas as semanas. Hai xente anónima que planta hortalizas de máis para despois doalas ao Concello e así repartilas entre as persoas que están a pasar por unha situación delicada”.
A edil nacionalista tamén lembrou o convenio asinado hai meses coa Fundación Alimerka “a través do que recibimos catro días á semana os excedentes de bolería”. No equipo de goberno están moi satisfeitos coa acollida que tiveron entre os ribadenses as diferentes iniciativas que se organizaron nas últimas semanas e nos últimos días. Teresa González aludiu á recolecta de alimentos típicos de nadal realizada pola Escola Municipal de Música e Danza e aos 700 euros recadados no Centro de Formación Integrada Porta da Auga “que se destinarán á compra de produtos para a infancia”.
A concelleira de Servizos Sociais anunciou que “agora tamén estamos a colaborar coa ONG Amarante e cos distintos grupos musicais da localidade nos concertos e mercadiños solidarios que se celebran esta fin de semana” e subliñou “a solidaridade do pobo ribadense durante todo ano e tamén nesta datas de nadal. Os recursos municipais son moi limitados e o que tentamos é encauzar as achegas do mellor xeito posible para beneficio das familias más necesitadas”.
ÚLTIMA HORA
- A FCAM analiza en Foz o crecemento turístico da Mariña
- O Departamento de Inmigración de Viveiro reforza a inclusión con nova formación para migrantes
- A nova campaña arqueolóxica no castro de Zoñán, en Mondoñedo, inclúe escavación, topografía e estudo de materiais
- A veciñanza do Valadouro esixe á empresa eléctrica unha solución aos microcortes diarios
- RadioVoz emitirá este venres desde Foz un programa especial para toda a provincia
Foz será o protagonista do programa Voces de Lugo, de RadioVoz, que se emitirá en directo de 12 a 14 horas desde a cafetería Marexada para toda a provincia. Félix Jorquera charlará co alcalde, Fran Cajoto; coa concelleira de Cultura e Facenda, Inés López; con Pura García, que é directiva de Acia Foz-CCA; con Carmen Alonso, presidenta do Celtas de Foz; e coa dona da cafetería Marexada, Palmira Andrade. Con eles fará un balance do verán, analizará os proxectos para os vindeiros meses e tamén o momento polo que atravesa o deporte local. - Lucía Legazpi López, a afortunada co Pasaporte de Acisa, voou estes días a Lanzarote para gozar do seu premio
Trátase dunha viaxe para dúas persoas con estancia de catro noites nun hotel de catro estrelas en réxime de todo incluído, voos e equipaxe. O sorteo tivo lugar o pasado mes de xuño. - Unha ITV móbil para inspección de vehículos agrícolas estará no mercado gandeiro de Vilanova de Lourenzá os días 5, 6, 7 e 8 de outubro
A cita previa pode solicitarse a través do teléfono 981.928.080 ou da web www.sycitv.com. - O Concello de Tapia de Casariego enviará á Consejería de Educación e ao Consorcio de Transportes o informe da Policía Local que alerta de que a supresión da parada escolar da Ventosa, en Mántaras, obriga seis alumnos a realizar un itinerario de 2,1 km pola N‑634 sen iluminación nin pasos de peóns, con riscos graves para a súa seguridade
A medida tamén fai que as familias perdan a gratuidad do comedor escolar, asumindo un gasto novo. O Concello reclama recuperar a parada mentres non exista unha alternativa segura e manter tanto o transporte como o comedor gratuíto, pedindo unha solución urxente que non prexudique ás familias de Mántaras. - A Sala Cultural Xosé Vizoso, en Sargadelos, acolleu esta fin de semana o II Torneo de Xadrez de Cervo, unha cita na que a concentración, o deporte e o xogo en equipo foron protagonistas
Un total de 32 participantes déronse encontro nesta segunda edición, demostrando o seu nivel e desfrutando dunha mañá de competición e compañeirismo. Os gañadores das diferentes categorías foron: Antón Pernas (Sub 8), David Bustabad (Sub 10), Xulio Pernas (Sub 12), Deivid Pérez (Sub 14), Manuel Castro (Sub 16) e Breixo Alvite (Sub 18). A alcaldesa de Cervo, Dolores García Caramés, entregou os trofeos e medallas aos vencedores. O Concello felicita a todas as persoas participantes polo seu esforzo e por contribuír ao crecemento do xadrez no municipio, reafirmando a súa aposta polo deporte, pola participación e por ofrecer novas oportunidades para gozar e aprender. - O deputado Daniel García participou, xunto ao alcalde de Muras Manuel Requeijo e a tenente alcalde Paula Gómez, na entrega de premios do Gran Premio CiclistaConcello de Muras, que se celebrou este sábado coa colaboración da Vicepresidencia da Deputación
A proba , organizada polo Club Ciclista Viveiro, reuniu máis de 130 ciclistas e coroou as campioas galegas de todas as categorías femininas -desde infantil ata master-, e aos campions galegos de infantil e cadete. A Praza da Galeguidade acolleu a saída e meta da competición, que se desenvolveu nun circuíto estático de 18,9 quilómetros pasando polo Porto da Gañidoira, a 699 metros de altura. - O Concello de Vilalba incorporou ao seu parque móbil municipal dous novos vehículos híbridos con distintivo ambiental ECO, que estarán destinados ao uso do persoal municipal e ás necesidades derivadas da actividade diaria do Concello
Trátase de dous MG ZS Hybrid+ Comfort, equipados coa tecnoloxía híbrida autorrecargable Hybrid+, que permite combinar eficiencia e un menor consumo no uso habitual. Segundo os datos do fabricante para este modelo, presenta unhas emisións de entre 113 e 115 g/km de CO₂ e un consumo de combustible de entre 5 e 5,1 litros aos 100 quilómetros, segundo o ciclo WLTP. A adquisición supuxo un investimento de 51.848,50 euros, IVE incluído, financiado a través do Fondo de Compensación Ambiental correspondente ao ano 2026.
2021 Crónica 3 A Mariña - Implementado por GaliciaDigital