Amigos da Terra e o Fondo Galego apostan pola protección medioambiental en Nicaragua

O Fondo Galego de Cooperación e Solidariedade apoia en Nicaragua a xestión ambiental de dúas áreas protexidas a través dun proxecto subvencionado a Amigos da Terra con 20.000 euros, unha actuación que se fai pública coincidindo co Día Mundial do Medio Ambiente, que se celebra hoxe. A ONGD ecoloxista traballa coa fundación nicaraguana Líder no fortalecemento das capacidades locais para a conservación das reservas naturais do volcán Cosigüina e do delta do Estero Real, ambas as dúas no Golfo de Fonseca, un dos ecosistemas máis representativos de Centroamérica.

Para acadar este obxectivo e contribuír así ao desenvolvemento sostible da zona, estase a formar ao persoal tanto das oficinas ambientais das municipalidades de El Viejo e Puerto Morazán como dos Comités de Manexo Colaborativo de senllas áreas protexidas, que están integrados polos principais actores locais, os propios gobernos municipais e mais os líderes e lideresas das comunidades afectadas. Tamén se lles dotará das ferramentas necesarias, coma equipos informáticos ou GPS.

Ao tempo, melloraranse os plans operativos das reservas e iniciaranse as accións contempladas neles, entre as que destaca a reforestación do manglar, que é clave para manter a biodiversidade. Asemade, sensibilizarase as lideresas e líderes locais implicándoos en diferentes campañas ambientais, feiras, charlas ou obradoiros e tamén se editarán folletos e outros materiais para visibilizar a problemática e concienciar sobre a protección do medio.

Nunha zona onde a maior parte da poboación vive na extrema pobreza, o proxecto busca involucrar as comunidades na xestión sostible dos recursos naturais, que mesmo teñen valor turístico. A iniciativa contempla tamén o enfoque de xénero, ao promover a participación das mulleres na toma de decisións. Amigos da Terra leva traballando no sector nicaraguano do Golfo de Fonseca desde 2004, ano en que iniciara o seu labor na zona co apoio do Fondo Galego.

O Fondo Galego
O Fondo Galego de Cooperación e Solidariedade está integrado por 89 Concellos e as Deputacións da Coruña e Lugo, que concentran a través desta rede os seus esforzos no eido da cooperación ao desenvolvemento. Garántese deste xeito unha xestión profesional e transparente, así como a realización de proxectos con impacto nos países do Sur e a sensibilización da sociedade galega a prol da solidariedade internacional. Desde a súa fundación en 1997, o Fondo Galego ten desenvolvido 142 proxectos en 25 países e promove numerosas actividades e materiais en relación aos desequilibrios Norte-Sur.