A Coordinadora Galega de ONGD promove a campaña ‘Maniféstate’ con motivo do 17-O, Día contra a pobreza

A Coordinadora Galega de ONGD e a campaña Impórtanos, promovida polo Consello Municipal de Cooperación Internacional e Solidariedade de Vigo, poñen en marcha Maniféstome, unha campaña de sensibilización e denuncia das causas da pobreza coincidindo co 17 de outubro, Día internacional pola erradicación da Pobreza

Maniféstome a favor dunha banca ética; maniféstome en contra o trato discriminatorio ás persoas inmigrantes; ou maniféstome a favor do consumo responsable son algúns dos lemas cos que a cidadanía galega poderá fotografarse en distintas cidades galegas esta semana. As imaxes circularán polas redes socias

Será unha manifestación en diferido en distintos espazos e días para que todas as persoas poidan esixir a redistribución da riqueza e o fin da inxustiza social!

O photocall Maniféstome estreouse onte, 14 de outubro, na Facultade de Maxisterio da USC e ten previsto seguir a súa andaina os próximos días:

16 de outubro: estará na Coruña, na entrada da Escola Técnica Superior de Enxeñeiros de Camiños de 10 a 18:30 horas.

17 de outubro: estará en Vigo, Av Castelao, xunto a praza América, de 11 a 20 horas.

Dende a organización, ademais, convidamos a calquera colectivo ou institución a solicitar o photocall para instalalo na súa vila ou cidade.

Loita contra a Pobreza
Hoxe, no mundo, 1.300 millóns de persoas viven nunha situación de pobreza extrema e 1.000 millóns pasan fame a diario. Mentres, cada ano acaban no lixo máis de mil toneladas de alimentos e o 1% das persoas máis ricas do planeta seguen a incrementar os seus ingresos. Pola súa banda, o Estado español sitúase na cumio das desigualdade sociais en Europa, por diante, incluso, de países duramente golpeados pola crise como Grecia, e só por diante de Portugal, Letonia e Bulgaria, segundo datos de Intermón Oxfam.

A pobreza é cada vez máis extrema, intensa e crónica. As desigualdades, causa e consecuencia á vez da crise global e complexa que vivimos, aumentan debido, entre outras cousas, a unha fiscalidade inxusta e unhas políticas de austeridade desvastadoras que mesmo poñen en perigo a universalidade dos servizos públicos e dos dereitos das persoas. Mentres, o custo de bens e servizos básicos como alimentos, enerxía e medicamentos aumentan en todo o mundo; o acceso á educación, sanidade e servizos sociais públicos dificúltase; e desmantélase a política de cooperación ao desenvolvemento .

Existen claras semellanzas entre estes programas de austeridade e as ruinosas políticas de axuste estrutural impostas en América Latina, o Leste Asiático e África subsahariana nas décadas de 1980 e 1990, segundo denuncia Intermón Oxfam . Estas políticas foron un fracaso; un tratamento que pretendía “curar a enfermidade matando o paciente”. Por iso manifestámonos para que non se repita!

Dende Maniféstome propoñemos denunciar as causas da pobreza e apostar por alternativas xustas, responsables e solidarias a favor dun crecemento inclusivo que favoreza ás persoas, as comunidades e o medio. Temos máis de 40 lemas!