Estoa empraza a Feijóo a unha xuntanza antes do 6 de novembro con membros de Iniciativa Galega pola Gratuidade da Sanidade

Riotorto, 4 de novembro de 2013. O alcalde nacionalista de Riotorto, Federico Gutiérrez Estoa, envioulle no nome da Iniciativa Galega pola Gratuidade da Sanidade, unha carta ao presidente da Xunta de Galiza, Alberto Núñez Feijóo, para solicitarlle unha xuntanza con membros deste colectivo a fin de lograr que o máximo dirixente galego recapacite na súa decisión de aplicar o copago farmacéutico para doentes crónicos e non obrigue a pagar por estes fármacos aos pacientes galegos. Neste sentido, Estoa apelou a Feijóo a actuar “con humanidade” e darlle unha solución a este problema, solicitándolle unha xuntanza con membros da Iniciativa Galega pola Gratuidade da Sanidade.
Federico Gutiérrez Estoa mostroulle as súa “estrañeza polo feito de que até a data teña apoiado esta decisión do Goberno do Estado de multar a aqueles galegos e galegas que cometen o delito de contraer unha enfermidade crónica e, por suposto, que non seguise o exemplo doutros territorios veciños como Asturias ou Castela- León que decidiron non aplicar este prexuizoso copagamento”.

Os representantes sociais e institucionais que o 26 de outubro conformaron en Riotorto a Iniciativa Galega pola Gratuidade da Sanidade cualificaron a decisión do Goberno do Estado de “aprobar unha Resolución pola que se obriga aos pacientes crónicos a afrontar o copago das menciñas que lle son dispensadas na farmacia dos centros hospitalarios significa cruzar todas as liñas vermellas da sanidade. Trátase dun novo imposto á enfermidade e supón unha carga moi importante na economía de moita xente desfavorecida. É unha medida indigna, inhumana, inxusta, que retrata a un goberno que actúa ao servizo do poder económico”.

As demandas da Iniciativa Galega pola Gratuidade da Sanidade son claras: instar ao Presidente da Xunta Galiza a que paralice a entrada en vigor da Resolución do 10 de setembro de 2013, da Dirección Xeral da Carteira Básica de Servizos do Sistema Nacional de Saúde e Farmacia, pola que se procede a modificar as condicións de financiamento de medicamentos incluídos na prestación farmacéutica do Sistema Nacional de Saúde mediante a asignación de achega do usuario e na mesma liña demandar do Goberno do Estado a derogación da resolución recollida no BOE do 10 de setembro que establece a obrigatoriedade da achega do usuario para as patoloxías e a carteira de medicamentos fixadas na referida resolución.

Federico Gutiérrez Estoa afirmou que “se Feijóo non atende unha demanda da sociedade fronte a un tema de semellante gravidade como o que temos diante manterémonos na batalla social, que xa vai na liña de realizar o día 8 de novembro, concentracións en todas as Comarcas e nos Hospitais de referencia das cidades, para socializar e popularizar esta loita, pero sobre todo para que fique patente a opinión da sociedade e a oposición do pobo a esta decisión”.
Do mesmo xeito, se o goberno persiste na súa posición, o vindeiro 17 de novembro Galiza erguerá a súa voz contra eles e a súa asunción desta medida que constitúe un auténtico imposto á enfermidade e que terá especial incidencia sobre as rendas máis baixas.