Villares reúnese en Madrid co Director Xeral de Sostibilidade da Costa e do Mar para solicitar a cesión da Casa do Mar

Cervo, 22 de xaneiro de 2014-O alcalde de Cervo, Alfonso Villares, desprazouse ata Madrid para solicitar persoalmente a cesión da Casa do Mar e a axilización dos trámites. O rexedor mantivo unha reunión co Director Xeral de Sostibilidade da Costa e do Mar, Pablo Saavedra, e co voceiro do Grupo Parlamentario Popular no Senado, José Manuel Barreiro. Foi precisamente Barreiro o que mediou para conseguir esa xuntanza, polo que Villares quixo agradecerlle o seu traballo e implicación coa problemática da Casa do Mar.

Durante o encontro, o primeiro edil explicou a necesidade do Concello de Cervo de dispoñer “canto antes” da Casa do Mar, especialmente “para poder albergar nela un servizo tan importante como é o Punto de Atención á Infancia”, pero tamén en xeral, “para aproveitar o inmoble en beneficio de toda a veciñanza”.

O rexedor lembrou que se trata dun edificio amplo, cunha superficie útil de 1.164 metros cadrados distribuídos en tres andares (soto, planta baixa e planta alta) e ben situado, nas proximidades da praia do Torno e na zona céntrica da vila de San Cibrao. “É un edificio moi versátil, con moitas posibilidades, e sería moi positivo para a poboación poder utilizalo con total liberdade”. Cabe destacar que na actualidade a Casa do Mar ten un certo uso, pero moi limitado xa que a súa propiedade, en mans de Costas, non permite ningunha obra nin modificación.

Villares agarda que o Goberno central, e o director xeral en particular, sexan sensibles a esta petición do Concello, e poidan acelerar todos os trámites precisos para dispoñer do edificio coa máxima urxencia posible.

O Concello ten feito múltiples xestións para conseguir a propiedade da Casa do Mar. Foi no 2008 cando o edificio quedou sen uso e, nese momento, a administración cervense comezou coas primeiras xestións, enviando escritos á Subdelegación do Goberno en Lugo, naqueles momentos en mans socialistas. Durante anos o trámite estivo paralizado nos despachos de Lugo. Pero non foi ata a chegada do goberno do PP no Estado cando as xestións comezaron a dar os seus froitos. No 2012 o rexedor mantivo as primeiras reunións con responsables provinciais, tanto da subdelegación como do ISM e a TXSS. Incluso o director provincial do ISM visitou a Casa do Mar nos primeiros días do seu cargo.

A principios de 2013 o Concello recibira unha comunicación da Tesourería Xeral da Seguridade Social na que propoñía o pagamento dun aluguer para poder utilizar a Casa do Mar, unha medida que a administración local rexeitou por ser “transitoria e non solucionar a situación de forma definitiva implicando ademais un gasto excesivo para as arcas municipais” lembra o rexedor.

Despois de diversos contactos coas diferentes administracións implicadas determinouse que a única solución para conseguir a cesión era solicitar a desafectación da Casa do Mar do dominio público marítimo terrestre. Un asunto que foi levado a pleno, aprobado pola corporación e notificado á Dirección Xeral de Sostibilidade da Costa e do Mar.

Lembrar tamén que hai pouco máis dun mes o rexedor e a edil de Educación, Pilar Armada, apoiaron a reivindicación dun grupo de pais e nais que solicitaban a axilización da cesión para poder utilizar a Casa do Mar como sede do PAI.

Polo tanto, “esta é unha petición de toda a veciñanza, que reclama dende hai anos unha mellor utilización e aproveitamento da Casa do Mar e, por suposto, do Concello”.