AGE asegura que “o novo etiquetado favorece claramente os intereses das multinacionais no tocante aos produtos do mar”

Bruxelas, 13 de Decembro 2014. O 22 de novembro de 2011 publicouse no Diario Oficial da Unión Europea o novo Regulamento (UE) número 1169/2011 do Parlamento Europeo e do Consello -do 25 de outubro de 2011- sobre a información alimentaria facilitada ás persoas consumidoras, polo que se modifican os Regulamentos (CE) número 1924/2006 e (CE) número 1925/2006 do Parlamento Europeo de do Consello, e polo que derróganse a Directiva 87/250/CEE da Comisión, a Directiva 90/496/CEE do Consello, a Directiva 1999/10/CE da Comisión, a Directiva 2000/13/CE do Parlamento Europeo e do Consello, as Directivas 2002/67/CE e 2008/5/CE da Comisión e o Regulamento (CE) número 608/2004 da Comisión.

Polo tanto, dende hoxe mesmo, 13 de decembro de 2014 -logo do prazo de tres anos dende a súa entrada en vigor-, segundo se vén publicitando dende as institucións europeas, será obrigatorio que as persoas consumidoras podamos ter acceso á información sobre os ingredientes de obrigada declaración en tódolos alimentos, envasados ou non, incluídos os adquiridos en bares, restaurantes, comedores escolares, hospitais e os vendidos a granel[1].

Sen embargo, dende Alternativa Galega de Esquerda en Europa (AGEe[2]), valoramos que este regulamento favorece nalgúns dos seus aspectos ás grandes multinacionais xa que, polo que empezamos a coñecer con respecto ao que pode supoñer na práctica en relación aos produtos pesqueiros, este tipo de etiquetaxe, xunto con algúns aspectos da Política Pesqueira Común (PPC), perxudica claramente ás Denominacións de Orixe (DO’s) en produtos pesqueiros como o mexilón e mesmo, como puidemos saber a través dos medios de comunicación, afectaría tamén á ameixa, que poderá aparecer etiquetada vinculada a augas portuguesas e non a augas galegas.

“Facer a compra é un acto político. A de alimentos moito máis, pois comemos cada día e é do último que prescindimos”, esta é unha reflexión que a eurodeputada de AGEe Lídia Senra vén difundindo dende fai moitos anos, e que agora, no marco da entrada en vigor deste Regulamento número 1169/2011, e da súa posíbel modificación con respecto ás normas de etiquetado dos alimentos procedentes da pesca e da acuicultura a nivel europeo que a Comisión vai propor neste mes, volta estar de plena actualidade.

As multinacionais son perfectamente conscientes do poder que temos cando eliximos o que mercamos, e saben que cada día hai máis persoas que non somos simples consumidoras, senón que queremos decidir que comemos, quen e onde queremos que se produza e a que economías queremos apoiar co “acto político” de mercar.

Polo tanto, dende AGEe imos traballar fortemente pola inclusión do mexilón dentro da proposta que vai realizar a Comisión Europea neste mes de decembro para modificar o Regulamento da Organización Común de Mercados no Sector dos Produtos da Pesca e da Acuicultura. De feito, Lídia Senra -suplente do Grupo Confederal da Esquerda Unitaria Europea/Esquerda Verde Nórdica (GUE/NGL) na Comisión de Pesca- xa rexistrou o pasado 13 de novembro unha pregunta parlamentaria por escrito sobre este aspecto. “‘Si’ a incluír o país de procedencia dos produtos do mar. Galiza ten que figurar como país de procedencia no etiquetado de todos os nosos produtos, incluídos os do mar”, demanda a eurodeputada galega.

“O novo etiquetado que entra en vigor hoxe favorece claramente ós intereses das multinacionais no tocante aos produtos marítimos, e prívanos como consumidoras do dereito a coñecer a procedencia do que comemos e de dicir que economía queremos favorecer cos nosos cartos”, denuncia Senra.

“Hai anos que as multinacionais, nas negociacións de comercio internacional -nas rondas da Organización Mundial do Comercio (OMC) antes, e agora nos tratados de libre comercio (TLC’s)- queren eliminar as denominacións de orixe e indicacións xeográficas protexidas (IXP’s). Ate o presente, no agro non llo permitimos”, lembra a eurodeputada de AGE. De feito, “no tratado da UE con Canadá [Comprehensive Economic and Trade Agreement, CETA], ningunha das IXP ou DO’s galegas aparece como protexida, e esta é unha das razóns polas que temos que loitar para que o Parlamento Europeo non ratifique o CETA no 2015”.

Á vista da normativa que entrou en vigor hoxe, parece que na última reforma da Política Pesqueira Común as multinacionais xa conseguiron incluír unha forma de etiquetado que atenta contra a Denominación de Orixe do Mexilón de Galicia. “Foi miopía das forzas políticas que constituían goberno e oposición no momento das negociacións da Política Pesqueira Común e dos deputados e deputadas que había nese momento no Parlamento Europeo?”, cuestiona Senra, “Ou foi o interese de favorecer os negocios dos grandes fabricantes de conservas, que no noso país habelos hainos, e con fortes intereses en países que teñen asinado acordos de libre comercio coa Unión Europea, como é o caso de Chile?”.

Dende AGEe temos moi claro que hai que reaccionar e obrigar a que a Comisión Europea responda en positivo na proposta de modificación que vai presentar neste mes, obrigándoa a incluír Galiza como lugar de procedencia no etiquetado do mexilón, das ameixas ou de calquera outro produto do mar. “Defendamos o noso, defendamos os intereses das clases populares, non os deixemos pasar con isto”, instou Lídia Senra.