Lídia Senra participará este venres na concentración convocada pola Asociación Long Hope diante do Consulado noruegués na Coruña

Bruxelas, 26 de marzo de 2015.- Lídia Senra, eurodeputada de Alternativa Galega de Esquerda en Europa (AGEe) participará este venres 27 de marzal na concentración convocada pola Asociación Long Hope diante do Consulado noruegués na Coruña (R/ Federico Tapia 33/35) ás 12.00hrs.

Denuncias realizadas por AGE no Parlamento Europeo
– Paralelamente ás accións realizadas por AGE dende o Parlamento Galego, Alternativa Galega de Esquerda en Europa rexistrou xa no pasado mes de xullo unha pregunta parlamentaria en relación aos dereitos dos mariñeiros do Estado español a quen o Goberno de Noruega está a privar de recibir as súas cotizacións, corroborando ca resposta da Comisión que o Goberno noruegués”debería respectar as disposicións transitorias que figuran no novo Regulamento simplificado (CE) nº 883/2004″, que indica que “toda prestación que non tivera sido liquidada ou que fora suspendida a causa da nacionalidade ou da residencia da persoa interesada será, a petición desta, liquidada ou restablecida.”
– Aliás, a eurodeputada de AGEe promoveu tamén no mes de decembro unha carta asinada por 33 eurodeputadas/os en apoio aos mariñeiros, remitíndolla directamente á primeira ministra norueguesa Erna Solberg a principios de xaneiro, instándoa a cumprir co Regulamento (CE) nº 883/2004.
– No mes de febreiro Lídia Senra fixo chegar á Alta Representante da Unión Europea para Asuntos Exteriores e Política de Seguridade, Federica Mogherini, unha solicitude formal para a realización dunha xuntanza con representantes dos mariñeiros afectados pola negativa do Goberno de Noruega a reembolsarlles as cotizacións derivadas do seu traballo durante décadas na mariña mercante norueguesa.
– A principios deste mes de marzal, a Comisaria europea de Emprego, Asuntos Sociais, Capacidade e Mobilidade Laboral, Marianne Thyssen, ratificou a AGEe -a través da resposta a unha carta dirixida á Comisaria en xaneiro- a pertinencia de facer valer o Art.n°16 do Regulamento (CE) n°883/2004, -que “confire ás autoridades competentes dos Estados membro a posibilidade de celebración de acordos bilaterais en interese de determinadas persoas ou categorías de persoas”-[4], tal e como llo trasladara propia Lídia Senra á primeira ministra norueguesa Erna Solberg en decembro e á Alta Representante da Unión para Asuntos Exteriores e Política de Seguridade, Federica Mogherini, en febreiro.

A eurodeputada de AGEe, Lídia Senra, logo de que as distintas respostas proporcionadas pola Comisión Europea teñan confirmado claramente a posibilidade de chegar á resolución desta situación a través dun acordo entre Gobernos, e dado que 10.000 das 12.000 persoas afectadas son galegas, reivindicou que o Presidente da Xunta, Alberto Núñez Feijoo, “debe empregar inmediatamente tódolos recursos dos que dispón para forzar ao Goberno español a asumir as súas responsabilidades e dar os pasos precisos para abrir unha vía de diálogo resolutivo co Goberno noruegués”.