Lugo, 28 de agosto de 2015.- A presidenta da Deputación, Elena Candia, anunciou que dende o goberno provincial se adoptou a decisión de iniciar unha campaña para promocionar a marca de leite Galega 100% (selo que distingue aos produtos lácteos galegos de calidade superior) na provincia e, deste xeito, incentivar o consumo do produto galego.
Candia explica que deste xeito unímonos ao traballo da Xunta de Galicia, xa que “con máis apoio institucional o alcance tamén será maior” e , neste senso, a presidenta matizou que a campaña se desenvolverá en coordinación cos hostaleiros a través da Asociación Provincial de Hostalería. “Traballaremos cuns dos principais consumidores directos de leite, para que vendan produto galego 100% o que tamén terá un efecto de imaxe para os seus clientes”.
Deste xeito, a presidenta da Deputación engadiu que hoxe arrincou esta proposta de campaña que foi ben acollida pola hostalería e que a próxima semana prevese unha reunión co presidente da asociación Provincial para concretar esta acción, o seu deseño e a súa dotación económica que “será o máis ambiciosa posible, sumándonos á campaña da Xunta de Galicia”.
Candia asegurou que se está a cumprir cunha das demandas que lle transmitiu o sector: a de que o consumidor “de xeito áxil visualice que ese leite é 100% galego”, así as administracións temos que “desenvolver un traballo de colaboración, neste caso coa Xunta de Galicia, que tamén sacou adiante unha campaña para promocionar a marca, e que un veciño que toma este leite saiba que está a axudar ao sector primario e aos nosos gandeiros que están a pasar un momento complicado”.
Por último, a presidenta da Deputación lembrou o compromiso do goberno provincial de “axudar a este sector a medida que nolo ía pedindo e pese a non ter competencias”. Nesta liña, dende o goberno provincial tamén se cursaron as súas demandas na Granxa Gayoso Castro a través do peche da unidade de leite, para non facerlle competencia desleal ao gandeiro
Comprometidos co sector pesqueiro
A Deputación de Lugo concede á Federación Provincial de Confrarías unha subvención directa excepcional para dotar de medios materiais (traxes de neopreno) aos mariscadores activos afiliados ás confrarías; así como para divulgar e promocionar as actuacións que realiza a Federación.
O deputado delegado de Pesca, Demetrio Salgueiro, defendeu a importancia desta subvención que permitirá, por un lado, dotar ás mariscadoras dos medios materiais para que podan garantir con seguridade o seu traballo e, por outro lado, as accións de promoción do sector pesqueiro son fundamentais para de forma conxunta dar a coñecer os produtos da provincia.
A contía da axuda é de 19.000 euros e cubrirá o 95% do custe do proxecto. En concreto, para a divulgación, promoción e publicidade das actuacións que realiza a Federación, o importe da subvención é de 11.400 euros; mentres que para a dotación de medios materiais, a contía é de 7.600 euros.
Salgueiro resaltou a importancia desta axuda xa que “hai que ter en conta que a Federación Provincial de Confrarías de Pescadores de Lugo aglutina a todas as confrarías da provincia, representando á totalidade dos axentes implicados no sector pesqueiro”. O deputado engade que “está fóra de toda dúbida que o sector pesqueiro representa un dos motores económicos da provincia, sendo necesaria a aplicación destas axudas na defensa e fomento do sector pesqueiro”.
“Estamos a cumprir coas demandas que nos trasladaron na reunión mantida co sector”, explicou Salgueiro, quen lembrou que xa se aprobou a concesión de 33 subvencións a propietarios de embarcacións de pesca de baixura, por un importe total de 95.285,07 euros. “Defender, fomentar e axudar ao sector pesqueiro supón garantir o sustento dun número moi importante de traballadores, axudar a fixar poboación nas localidades costeiras e contribuír na consolidación do importante entramado económico que xera ao seu carón, entre outros”, matizou o deputado
Facilidades administrativas para concellos e entidades
A presidenta da institución explicou que se continúan a facilitar os trámites administrativos tanto a concellos como a comunidades e asociacións para que podan xustificar as súas actividades en prazo e non perdan a subvención concedida pola administración provincial.
En concreto, na Xunta de Goberno de hoxe aprobouse a prórroga de prazo de execución das actividades subvencionadas ao abeiro do Programa de mellora de abastecemento e da calidade de auga no medio rural, de tal xeito que este prazo se amplía ata o 30 de setembro. A maiores, tamén se deu conta de varias addendas a convenios de colaboración con municipios, nas que se amplía o prazo de execución ata o 31 de decembro.
Continúase con normalidade o desenvolvemento do Ben Empregado
A web da Deputación de Lugo publicou este venres a listaxe de demandantes de emprego admitidos e excluídos na segunda fase do Ben Empregado II. Finalizouse a tramitación das 1737 solicitudes recibidas ao abeiro deste plan, para acceder a un dos 304 postos de traballo que ofrecen as empresas beneficiarias do Ben Empregado. Do total de solicitudes recibidas e unha vez requirida a documentación necesaria, 1520 adecuáronse as base, mentres que 217 non compren con elas. En setembro iniciarase o proceso de entrevistas, así na semana do día sete colgaranse as citacións.
A maiores, dentro do Ben Empregado II, as empresas beneficiarias entregaron a documentación requirida en forma e prazo, agás unha delas e, a maiores, tres empresas renunciaron a subvención.
No que respecta ao Ben Empregado I, cubríronse 6 perfís desertos a raíz de que os traballadores seleccionados no seu momento renunciaran ao posto ou non superaran o período de proba coa empresa. Do mesmo xeito e por motivo de renuncias por parte de trece empresas adxudicatarias dentro do programa Ben Empregado I, convocáronse 13 novos perfís que despois dos requirimentos e emendas tamén se publica a listaxe de admitidos e excluídos.
Polo tanto, Candia reiterou que este procedemento se está a resolver dun xeito áxil e o informes técnicos avalan que a día de hoxe o Ben Empregado segue sen incidencias e con normalidade.
Outros asuntos aprobados en Xunta de Goberno
Na Xunta de Goberno de hoxe tamén se aprobou o expediente de contratación da subministración de consumibles para a racionalización dos equipos de impresión, xunto ao prego de cláusulas administrativas e prescricións técnicas, así como o procedemento de adxudicación, e o gasto por un importe de 48.400 euros (IVE incluído).
De igual maneira, deuse conta neste órgano do modelo de convenio e da relación de alumnos que participarán na acción formativa Dinamización de Actividades de Tempo Libre Educativo, Infantil e Xuvenil, concedido pola Xunta de Galicia, dirixido prioritariamente a desempregados, cun orzamento de 20.358 euros. Tamén se aprobaron os lugares nos que se realizarán as prácticas.
Por último, tamén se aprobou o plan de seguridade e saúde no traballo da obra de rehabilitación do firme na estrada provincial LU-P-5206 da C.N. 634, na Devesa, á praia dos Castros, en Ribadeo.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
